Innsending av årsrekneskap
Sist oppdatert: 28. februar 2024.
Alle innsendingspliktige verksemder skal sende komplett årsrekneskap til Rekneskapsregisteret seinast 31. juli. Vi kan ikkje utsette fristen.
Innsendingsplikta gjeld sjølv om det ikkje er drift eller aktivitet. Dersom verksemda ikkje overheld fristen, får de eit forseinkingsgebyr som kan bli 66 404 kroner.
Når årsrekneskapen er saksbehandla, får verksemda vedtaket i innboksen i Altinn, med varsling på e-post eller SMS.
Er årsrekneskapen send før fristen, får du to veker til å rette opp feil eller manglar utan å få forseinkingsgebyr. Dette gjeld ikkje når årsrekneskapen blir send etter fristen.
De må ikkje forveksle innsending av årsrekneskapen til Rekneskapsregisteret med innsending av skattemeldinga til Skatteetaten. Dette er to ulike rapporteringsplikter.
Styret, eventuelt deltakarane eller dagleg leiar, har ansvaret for å sende årsrekneskapen sjølv om det er avtalt at rekneskapsførar eller revisor skal gjere det.