Stifte og registrere bustadbyggelag

Eit bustadbyggelag skal registrerast i Føretaksregisteret. Fristen er tre månader frå stiftelsesdokumentet er signert av stiftarane.

Saka blir tatt til behandling av ein saksbehandlar innan ti arbeidsdagar. Du kan sjå datoen vi har komme til i saksbehandlingskøen vår på sida Når blir saka mi behandla.

For å stifte eit bustadbyggelag må stiftarane oppretta eit stiftelsesdokument

Stiftarane er dei som skal teikne delane i laget. Det må vere minst tjue deleigarar når bustadbyggelaget blir stifta, og delane skal teiknast i stiftelsesdokumentet. Fysiske personar kan berre eige ein del kvar, mens juridiske personar, som for eksempel eit aksjeselskap, kan eige fleire delar.

Delane skal vere på minst kr 300, men ikkje større enn kr 5 000 og andelskapitalen ved stiftelse skal minst vere kr 100 000. De kan fastsette i vedtektene at delane skal ha ulikt pålydande.

Registrere bustadbyggelaget

Når du skal registrere eit bustadbyggelag må du legge ved

• stiftelsesdokument
• vedtekter
• opningsbalanse
• stadfesting frå revisor om at opningsbalansen er sett opp i samsvar med rekneskapslova sine føresegner
• original erklæring frå revisor som stadfester innbetalingsforholdet
• revisor si originale viljeserklæring, dersom revisor ikkje har signert i skjemaet
• rekneskapsførar si originale viljeserklæring, dersom dette er meldt og rekneskapsføraren ikkje har signert i skjemaet
• dokumentasjon som viser at meld rekneskapsførar er engasjert av kompetent organ
• protokoll frå styremøte eller generalforsamling som viser tilsetting av meld dagleg leiar, dersom det ikkje går fram av stiftelsesdokumentet
• protokoll frå styremøte eller generalforsamling som viser tildeling av meld signatur og/eller prokura, dersom det ikkje går fram av stiftelsesdokumentet eller vedtektene

Styremedlemmene og varamedlemmer må stadfeste i Samordna registermelding at dei tar på seg vervet.