Kapittel 6: Årsrekneskap

Dette er ei oppsummering. Les heile årsrapporten her. 

Formål

Brønnøysundregistera blei oppretta i 1988 under Justisdepartementet og er underlagt Nærings- og fiskeridepartementet (NFD). Verksemda er eit ordinært forvaltningsorgan og som frå 2017 fører verksemdsrekneskapen i samsvar med statlege rekneskapsstandardar.

Brønnøysundregistera forvaltar ei rekke register som er av stor betydning for næringslivet, både juridisk og økonomisk. Dataa våre er eit viktig bidrag for auka verdiskaping i Noreg, både for næringsliv, offentleg forvaltning og frivillig sektor. Verksemda skal også bidra til regjeringa sitt arbeid med å fornye, forbetre og forenkle for næringsliv og innbyggarar.

Årsrekneskapen utgjer del VI i årsrapporten til NFD.

Som det går fram av prinsippnoten er Brønnøysundregistera eit ordinært forvaltningsorgan som fører rekneskap i samsvar med periodiseringsprinsippet. I tillegg rapporterer vi til den sentrale statsrekneskapen etter kontantprinsippet jf. Note A og B.

Stadfesting

Årsrekneskapen er avlagt i samsvar med reglar om økonomistyring, rundskriv R-115 frå Finansdepartementet og krav frå Nærings- og fiskeridepartementet i instruks om økonomistyring. Eg meiner rekneskapen gir eit dekkande bilde av Brønnøysundregistera sine løyvingar, rekneskapsførte utgifter, inntekter, eigedelar og gjeld.

Vesentlege forhold etter kontantprinsippet

Brønnøysundregistera sine utgifter til registerdrifta er på totalt 564,5 MNOK. Samanstilt med løyvingar gir dette ei mindreutgift på til saman 6,7 MNOK. Dette omsyntatt meirinntekt på oppdragsinntekter på 1,4 MNOK, gir eit mogleg overført beløp på 8,1 MNOK til 2026.

Brønnøysundregistera sine gebyrinntekter relaterte til registerdrifta blei på 688,4 MNOK for 2025, som er ei auking frå 2024. Gebyrinntektene frå firmaregistrering i Føretaksregisteret har auka fordi gebyrsatsane blei heva frå 2024 til 2025. I tillegg blei det registrert fleire saker innanfor grupper med høg gebyrsats. Gebyrinntektene frå registrering i Einingsregistret har også auka samanlikna med 2024. Aukinga skuldast både at gebyrsatsane var høgare i 2025 samanlikna med 2024, og ein auke i antal registreringar.

Det er ein nedgang i gebyrinntektene frå tinglysning som skuldast at gebyrsatsane blei reduserte frå 2024 til 2025. Sjølv om antalet gebyrbelagde saker har auka, og dette isolert sett ville gitt høgare inntekter, er effekten av dei lågare satsane større enn verknaden av auka saksmengde, som samla sett førte til ein reduksjon i inntektene.

Brønnøysundregistera sine utgifter til ny registerplattform og prosjekt «Brukarvennlege registertenester” er på 136,8 MNOK. Samanstilt med løyvingane gir dette ei mindreutgift på 16,4 MNOK som mogleg overførbart beløp.

Det er gjort investeringar i immaterielle eigedelar og varige driftsmiddel etter kontantprinsippet for 109,9 MNOK i 2025. Dei vesentlegaste investeringane er knytte til ny registerplattform, prosjekt Brukarvennlege registertenester og andre utviklingsprosjekt.

Rapportert mellomverande med statskassa er 26 122 092 kroner per 31.desember 2025. Mellomverande består av skuldig skattetrekk, avsett pensjonspremie til SPK og skuldige offentlege avgifter. Spesifisering av rapportert mellomverande og bokført avrekning med statskassa går fram av Note 7B.

Vesentlege forhold etter periodiseringsprinsippet

Det er i perioden aktivert immaterielle eigedelar for 89,9 MNOK og det er bokført immaterielle eigedelar for 196,8 MNOK under utføring. Dette er i hovudsak relatert til ny registerplattform og andre utviklingsprosjekt. Total er det bokført programvare og liknande rettar til ein verdi av 1067,2 MNOK.

Totalt er det bokført inntekter frå gebyr på 710,8 MNOK. Det er ei auking på MNOK 18,8 i inntekt frå gebyr samanlikna med 2024. Aukinga skuldast auke i registeringar i Einingsregisteret og Føretaksregisteret.

Antal tilsette har auka med 11 til 483 samanlikna med 2024. Auken skuldast i hovudsak auka oppdragsportefølje og auka behov for drift og forvaltning. Det er balanseført lønn til 72,6 MNOK til eigenutvikling av register. Andre driftskostnadar er redusert med 16,9 MNOK samanlikna med 2024. Endringa skuldast at det i 2024 ble gjort ei oppdatering av teknisk anlegg som var ein eingongskostnad for 2024.

Tilleggsopplysningar

Riksrevisjonen er ekstern revisor og stadfestar rekneskapen for Brønnøysundregistera. Årsrekneskapen er ikkje ferdig revidert per d.d. Revisjonsmeldinga er antatt å vere ferdig innan 1. mai 2026. Årsrekneskapen blir publisert på Brønnøysundregistera sine nettsider 1. mai 2026.

Brønnøysund, 15. mars 2026.

Lise A. Dahl Karlsen

Kst. direktør