Endre opplysningar for eit allmennaksjeselskap

Du registrerer nytt namn ved å sende inn skjemaet Samordna registermelding i Altinn.

Det er generalforsamlinga som vedtar nytt namn. Endringa inneber endring av selskapet sine vedtekter.

Du må legge ved

• generalforsamlingsprotokoll
• oppdaterte vedtekter

På sida Korleis vel eg namn på verksemda mi? kan du lese meir om val av namn og kva omsyn du må ta.

Du registrerer ny adresse ved å sende inn skjemaet Samordna registermelding i Altinn.

Ny forretningsadresse

Forretningsadressa til eit allmennaksjeselskap skal vere ei norsk gate- eller vegadresse eller stadnavn.

Ved endring av adresse til ny kommune, må føretaket sine vedtekter endrast. Generalforsamlinga må godkjenne ei slik endring.

Ved endring til ny kommune, må du legge ved

• vedtekter
• protokoll frå generalforsamling som viser avgjerd om vedtektsendring

Ny postadresse

Du må ikkje melde ei eiga postadresse, men dersom du ønsker posten send til ei anna adresse enn den registrerte forretningsadressa, kan du melde ho som postadresse.

Når selskapet har valt nytt styre, skal du melde dette i skjemaet Samordna registermelding i Altinn. Dei nye styremedlemmene må samtykke til registreringa ved å signere i skjemaet.

Generalforsamlinga må velje styret.

Du må legge ved

• protokoll frå generalforsamling som viser vedtaket
• eventuelt protokoll/dokument som viser kven dei tilsette har vald til styret

Når selskapet tilsett dagleg leiar, skal du melde dette i Samordna registermelding i Altinn.

Det er vanlegvis ingen krav til vedlegg.

Unntaket er dersom du som dagleg leiar sjølv sender inn melding, og du ikkje har roller i styret. Da må du legge ved

• dokumentasjon som viser tilsettinga, for eksempel protokoll frå styremøte

Når selskapet endrar signatur, skal du melde dette i Samordna registermelding i Altinn.

Du må legge ved:

• protokoll frå styremøtet som viser tildeling av signatur, dersom ikkje heile styret har signert i skjemaet.

Det må gå tydeleg fram at signatur er tildelt, og om han er gitt i fellesskap eller kvar for seg.

Når selskapet har valt ny revisor, skal du melde dette i skjemaet Samordna registermelding i Altinn.

Generalforsamlinga må velje revisor. Revisor må bekrefte at hen tar på seg oppdraget, dette gjer hen ved å signere i skjemaet.

Du må legge ved

• protokoll frå generalforsamlinga som viser vedtaket

Alle rolleinnehavarar kan melde eigenfråtreden. Når du fråtrer gir du avkall på alle rettar og plikter som rolla di har. Du gjer dette i Samordna registermelding i Altinn. Når fråtredinga er registrert vil både selskapet og du som fråtrer bli varsla om dette.