EMAS-ordninga
EMAS står for Eco Management and Audit Scheme og er
EU si frivillige «fellesskapsordning for miljøstyring
og miljørevisjon». Ordninga starta i 1993 og er
eit tilbod til føretak og statlege, fylkeskommunale
og kommunale forvaltningsetatar som ønskjer å
marknadsføre at dei har sett seg programfesta mål
for å vareta miljøet i produksjonen og tenesteytinga
si. Gjennom EØS-avtala kan også norske verksemder
delta. Målet med ordninga er å fremje ei forbetring
av miljøinnsatsen i dei bedriftene som deltek.
Lovheimel
Bakgrunn for EMAS-ordninga er ei Europaparlaments- og Rådsforordning
(EF) nr. 761/2001 av 19. mars 2001 om frivillig medverknad
for organisasjonar i ei fellesskapsordning for miljøstyring
og miljørevisjon (EMAS). (Denne avløyser den
tidlegare Rådsforordning nr. 1836/93 av 29. juni 1993).
I Noreg er ordninga gjord gjeldande gjennom EØS-avtala
og heimla i forureiningslova av 13. mars 1981 § 52 a.
og c. og § 81 som forskrift fastsett av Miljøverndepartementet
21. mars 2003, med endringar i forskrift av 26.6.2003. Den
endra EMAS-ordninga tok til å gjelde 1.8.2003 i Noreg.
EMAS III
EU sitt miljøstyringssystem EMAS (Eco-Management and Audit Scheme) er revidert. EU-parlamentet og EU-rådet godkjente i desember 2009 den nye forordninga for EMAS.
Kan registrere også utanfor EU/EØS
Den nye forordninga – som tok til å gjelde i EU 11. januar 2010 – har fått nemninga Regulation (EF) Nr. 1221/2009. Ei viktig endring etter revisjonen er at det no er mogeleg å registrere organisasjonar (heile eller delar av organisasjonar) utanfor EU-/EØS-området.
Registreringa må gjerast hos eit registreringsorgan i eitt av landa i EU/EØS-området og ved hjelp av ein miljøkontrollør som er akkreditert/lisensiert i eitt av landa i EU/EØS. Det blir lagt opp til at dei einskilde landa kan avgjere om dei vil tilby slik registrering.
Uavklart i Noreg
Det blir for tida arbeidt med å få EMAS III implementert i norsk lov. Noreg har enno ikkje teke stilling til om vi skal tilby global registrering. Det blir også gitt høve for corporate registrering ved at ei verksemd med fleire dotterselskap kan samle desse på ei registrering.
Bruk av logo
Andre endringar i EMAS III er enklare reglar for bruk av EMAS-logoen. Han skal ikkje kunne forvekslast med miljømerke (produktmerking). Elles er det ikkje nokon konkrete krav. Registreringsorganet skal følgje opp at logoen blir brukt riktig, og at ikkje-registrerte og suspenderte verksemder ikkje brukar han.
Formål
EMAS er ei frivillig ordning for alle typar føretak
(organisasjonar), også for kommunale og statlege forvaltningseiningar
som dokumenterer miljøprestasjonen sin gjennom krav
om forpliktande miljøforbetringstiltak for heile organisasjonen
sin, eller for nærmare oppgitte område. I tillegg
til at alle europeiske land som er knytte til EU og EØS
deltek i EMAS, har også andre land utanfor EU vorte med i ordninga. EU-kommisjonen kunngjer registrerte
område på bakgrunn av lister frå dei deltakande
landa.
Kva ordninga inneber
Bedrifter som innfører EMAS lover å:
· kartlegge korleis bedrifta verkar inn på miljøet
· innføre eit miljøsystem
· sikre at lovar og reglar på miljøsida
blir overhaldne
· setje seg mål i form av miljøprogram
· gjennomføre miljørevisjonar for å
sikre at miljøstyringssystemet verkar
· setje i verk tiltak for å oppnå stadige
betringar på miljøsida
· vise meir open framferd og gi meir informasjon
til publikum ved å gi ut ei miljøutgreiing
Framgangsmåte
EMAS-ordninga krev at ein organisasjon etter ein miljøgjennomgang
kartlegg dagens miljøsituasjon på verkeområdet
sitt. Ut frå resultata blir det laga eit miljøprogram
som fastslår dei måla føretaket set seg
og beskriv dei styringssystema som må til for å
oppnå desse måla.
Miljøplanen må godkjennast av ein akkreditert
miljøkontrollør, og det heile blir dokumentert
og offentleggjort i ei miljøutgreiing. Når miljøutgreiinga
er godkjend, kan området bli registrert i EMAS-registeret.
Miljøutgreiinga må lagast og godkjennast på
nytt med jamne mellomrom og sendast til EMAS-registeret for
å fornye EMAS-registreringa. Revisjonsperioden kan maksimalt
vere tre år, men då med årlege, lettare
gjennomgangar.
Kostnader
Kostnadene for verksemdene er i hovudsak knytte til utvikling
av styringsverkty for miljøprestasjonen i verksemdene,
utgifter til gjennomgangen av miljøkontrolløren
og til utarbeiding av miljøutgreiinga, som skal gjerast
maksimum kvart tredje år. Registreringa i EMAS-registeret
er per i dag gebyrfesta med NOK 5 000 for dei tre-årlege
hovudrevisjonane og med NOK 3 000 for dei årlege
gjennomgangane. Med talet på registrerte verksemder
i dag er gebyra ikkje tilstrekkelege til å dekkje styresmaktene
sine utgifter, men etter kvart er det meininga at EMAS-registeret
skal vere sjølvfinansierande.
Aktørar med ansvar for å følgje opp
EMAS-ordninga
Miljøverndepartementet er hovudansvarleg for EMAS-ordninga
i Noreg. Klima- og forurensningsdirektoratet (KLIF) har frå departementet fått i oppdrag
å leggje forholda til rette for at norske bedrifter
skal kunne delta i EMAS-ordninga. Norsk
Akkreditering akkrediterer og fører tilsyn med
miljøkontrollørane. Dei akkrediterte miljøkontrollørane held miljøkontroll hos bedriftene og godkjenner miljøplanane
og miljøutgreiingane deira. Brønnøysundregistra
er ansvarleg for å registrere dei godkjende bedriftene
i EMAS-registeret, og på førespurnad gi ut lister
over EMAS-registrerte
område i Noreg. Alle registrerte bedrifter i Europa
er å finne i det Europeiske Fellesskapets Tidende.
Fordelar ved registrering
Internt:
- Betre interne produksjonsprosessar
- Betre oversikt og kontroll over ressursbruk og avfall/utslepp
frå bedrifta
- Redusert risiko for kostbare oppryddingsaksjonar
- Styrkte finansielle vilkår gjennom klargjering av
miljørisikoen og dermed redusert risiko for finansielle
samarbeidspartnerar, lån- og forsikringsgivarar
Eksternt:
- Auka truverde frå medarbeidarar, naboar, politikarar
og miljøorganisasjonar
- Bedrifta blir registrert i Brønnøysundregistra
og i eit EU-register. Her kan innkjøparar sjekke
leverandørar
- Fyller dokumentasjonskrav om kompetanse innanfor miljøstyring
for leverandørar i samband med regelverket for offentlege
innkjøp i så vel Noreg som EU
- Bedrifta får rett til å bruke ein EMAS-logo
saman med erklæring om medverknad. Logoen kan brukast
på brevark, konvoluttar, fakturaer, emballasje og
generelt informasjonsmateriell, men ikkje på produkt.
Logoen er felles for heile Europa og blir kjend att i alle
land.
EMAS vil bli ein kvalitetsstempel som mange vil sjå
på som eit vilkår for samarbeid.
Korleis registrere seg
I grove trekk krev EMAS-ordninga at bedrifta kartlegg miljøsituasjonen
ved å gjennomføre ein gjennomgang av miljøprestasjonen
under kontroll av ein akkreditert miljøkontrollør,
og å utarbeide ein miljørapport. Rapporten skal
godkjennast av ein akkreditert miljøkontrollør.
Ut frå resultata i gjennomgangen skal det lagast eit
miljøprogram med målsetjingar og beskriving av
dei styringssystema bedrifta skal bruke for å nå
måla. Når miljøutgreiinga er godkjend,
kan bedrifta registrere seg i EMAS-registeret. Bedrifta forpliktar
seg også til å gjennomføre miljørevisjonar
med ikkje meir enn tre år mellom kvar. Dette for å sikre
at miljøstyringssystemet verkar. Ved kvar revisjon
skal det utarbeidast ny godkjend miljøutgreiing. I
tillegg skal bedrifta gjennomføre årlege, lettare
miljørevisjonar.
Krav ved registrering
- Utfylt blankett,
underskriven av dagleg leiar, styre eller den som har signaturrett
- Miljøutgreiing som er godkjend av ein akkreditert
miljøkontrollør
Opplysningar som blir registrerte
- Organisasjonen sitt hovudkontor, plasseringa til det eventuelle
området
- Organisasjonen
- Kontaktperson
- Verksemda på området
- Miljøkontrollør
- Dato for godkjenning av miljøutgreiinga
- Dato for neste miljøutgreiing
EMAS-registeret kontrollerer den innkomne meldinga for å
sjå om organisasjonen eller området oppfyller
kravet i forordninga. Det blir vidare kontrollert om miljøkontrolløren
er akkreditert for verksemda som blir drive av organisasjonen
eller på området, om 3-års fristane er fornya,
og om godkjend miljøutgreiing eller årleg oppdatering
er overhalden.
Når meldinga til EMAS-registeret er godkjend, blir
Klima- og forurensningsdirektoratet (KLIF) varsla. Direktoratet har då 14 dagar på seg til å kome med eventuelle innvendingar
mot registrering, grunngjeve med manglande etterleving av gjeldande
lovfesta miljøkrav. Blir meldinga funne i orden, blir
ho godkjend.
Etter at fristen for å uttale seg er gått ut,
blir området endeleg EMAS-registrert og registreringsbevis
og -stadfesting blir sende ut. Deretter blir lista over EMAS-registrerte
område i Noreg oppdatert og send til EU-kommisjonen
i Brüssel for kunngjering.
Kontaktar
Miljøverndepartementet
Postboks 8013 Dep
0030 Oslo
Telefon: 22 24 90 90
Telefaks: 22 24 95 63
Klima- og forurensningsdirektoratet
Postboks 8100 Dep
0032 Oslo
Telefon: 22 57 34 00
Telefaks: 22 67 67 06
Norsk Akkreditering
Fetv. 99
2007 Kjeller
Telefon: 64 84 84 84
Telefaks: 64 84 84 86
Meir om EMAS
|
