 (02.12.2008) Tirsdag 2. desember gikk startskotet for registrering i Frivilligregisteret. Gjennom Altinn kan lag og foreiningar no sende elektronisk registrering.
Frivilligregisteret opnar for innmelding 2. desember, men det er viktig å merke seg at saksbehandling av meldingane startar 5. januar 2009. Sakene vil bli behandla i den rekkjefølgja dei blir sende inn. Lag og foreiningar blir oppmoda om å sende registrering elektronisk gjennom Altinn, då saksbehandling av desse meldingane vil gå raskare.
Registrering i Frivilligregisteret er eit vilkår for å vere med i Grasrotandelen. Grasrotandelordninga inneber at alle som speler på ein av Norsk Tipping sine spel kan velje at inntil fem prosent av den innsatsen dei legg inn skal gå til ein bestemt frivillig organisasjon.
På grunn av Grasrotandelen er driftsetjinga av ei løysing for innmelding framskunda i forhold til tidlegare plan. Resterande delar av det som skal bli den endeleg totale løysinga for Frivilligregisteret blir sett i drift først 5. januar 2009. Dette er hovudårsaka til at saksbehandlinga ikkje startar før over nyttår. Av same grunn vil ein også oppleve at informasjonen om Frivilligregisteret og frivillige organisasjonar på www.brreg.no vil få ei vesentleg nivåheving i januar. Blant anna vil vi i januar gjere tilgjengeleg ei løysing der ein enkelt kan søkje etter organisasjonar som er registrert i Frivilligregisteret.
Vidare gjer vi særleg merksam på at estimerte saksbehandlingstider for Frivilligregisteret vil bli publiserte første gong i januar. Vi understrekar at ein må rekne med at det kan bli lang saksbehandlingstid første kvartal 2009. Kor lang vil avhenge av kor mange meldingar som kjem inn. Den einskilde organisasjonen vil få tilsend tilbakemelding om registreringa når meldinga er behandla.
Men allereie no kan ein altså fylle ut og sende inn elektronisk melding for registrering i Frivilligregisteret.
For nærmare informasjon, sjå www.brreg.no/frivillighet.
|
