Slik fyller du ut Del 1 - Hovudblanketten

1 Namn/føretaksnamn
2 Meldinga gjeld
3 Registrering i andre register
4 Adressa til hovudkontoret (forretningsadresse/besøksadresse)
5 Postadresse
6 Gateadressa til verksemda
7 Innsendar/gebyransvarleg
8 Organisasjonsform
9a Stifting av eining. Start eller kjøp av verksemd
9b Sal eller nedlegging av verksemd
10a Kjøp/overtaking av verksemd frå
10b Sal/overdraging av verksemd til
11 Verksemd/bransje
12 Dagleg leiar, innehavar, forretningsførar eller annan kontaktperson
13 Reklame
14 Ønske om målform
15 Vedtekter/selskapsavtale
16 Kapital i aksjeselskap, allmennaksjeselskap, kommandittselskap og stiftingar
17 Vedtak om kapitalnedsetjing i aksjeselskap, allmennaksjeselskap og kommandittselskap
18 Fusjon
19 Fisjon
20 Styre, deltakarar o.a.
21 Signatur
22 Prokura
23 Revisor
24 Regnskapsførar
25 Norsk avdeling av utanlandsk eining
26 Offentlege eller utanlandske eigardelar
27 Konsern/føretaksgruppe
28 Andre merknader/opplysningar
29 Underskrifter 

1 Namn/føretaksnamn

1.1 Fullstendig namn/føretaksnamn på eininga

Feltet skal alltid fyllast ut.

Gi opp fullstendig namn og organisasjonsnummer for eininga. Gjeld det nyregistrering, tildeler Einingsregisteret organisasjonsnummer.

Også når du melder om endring av registrert namn/føretaksnamn, skal det registrerte namnet/føretaksnamnet til eininga før endringa førast opp her. Gi opp nytt namn/føretaksnamn i felt 1.2.

Ver merksam på at det er namnet/føretaksnamnet som blir oppgitt i dette feltet (ev. i felt 1.2 ved endring), som blir ståande på firmaattesten frå Føretaksregisteret.

Enkeltpersonføretak: Namnet på enkeltpersonføretak skal minst innehalde slektsnamnet til innehavaren, til dømes Holms Bilskadeservice. Dersom enkeltpersonføretaket ikkje har noko slikt eige namn, må ein føre opp både for- og etternamn.

Utanlandske einingar fører opp fullstendig namn/føretaksnamn for hovudføretaket. Utanlandsk eining med norsk avdeling fører opp namn/føretaksnamn for den norske avdelinga i felt 25.

Val av føretaksnamn

For næringsdrivande einingar (føretak) er det særleg viktig å vere påpasseleg med val av namn/føretaksnamn. Reglane om dette finst i føretaksnamnelova av 21. juni 1985. Dei viktigaste føresegnene finst under «Hjelp til regelverk» i Altinn.

NB! Einingsregisteret kontrollerer ikkje at reglane i føretaksnamnelova er følgde. Eininga har sjølv ansvaret for dette.
Ved registrering i Føretaksregisteret blir det kontrollert at føretaksnamnet tilfredstiller krava i føretaksnamnelova.

1.2 Eventuelt nytt namn/føretaksnamn

Feltet skal berre fyllast ut dersom eininga melder inn endring av registrert namn/føretaksnamn. Hugs at namnet/føretaksnamnet før endring skal førast opp i felt 1.1 saman med organisasjonsnummer som er tildelt tidlegare. Er eininga registrert i Føretaksregisteret, kjem det gebyr på namneendringa.

1.3 Eige namn på verksemda

Feltet skal berre fyllast ut dersom eininga driv verksemd under eit anna namn enn namnet til eininga. Dersom til dømes det fullstendige namnet til eininga er Lars Holms Pølsebu, medan ho i marknadsføring, korrespondanse o.a. berre heiter Grillbua, er det det sistnemnde namn som skal fyllast inn her.

2 Meldinga gjeld

I dette feltet skal du føre opp det meldinga gjeld. Ei melding kan gjelde desse forholda:
2.1 Registrering av eining som ikkje er registrert frå før
2.2 Endring av registrerte opplysningar eller nye opplysningar
2.3 Vedtak om oppløysing av eining
2.4 Sletting av eining

Dersom meldinga gjeld opplysningar om den verksemda eininga driv/eig, må felt 9 og 10 fyllast ut. Det skal sendast melding til Einingsregisteret i samband med overdraging/ overtaking og når verksemd blir nedlagd eller avslutta.

Overdraging av verksemd vil til dømes liggje føre når eit aksjeselskap kjøper ein frisørsalong frå eit anna aksjeselskap. Begge einingane skal i så fall melde inn endringa til Einingsregisteret på kvar sin blankett.

• Den eininga som kjøper/tek over verksemda, skal gi opplysning om dato for kjøpet/overtakinga av verksemda i felt 9a. Felt 10a skal fyllast ut med opplysningar om tidlegare eigar
• Seljar/overdragar skal gi opp dato for salet/overdraginga av verksemda i felt 9b. Felt 10b skal fyllast ut med opplysning om ny eigar

Dersom verksemda har slutta eller er nedlagd, gir du opp dato i felt 9b. Melding om at verksemda blir nedlagd eller opphøyrer, inneber ikkje at eininga blir sletta frå Einingsregisteret. Vil du slette eininga, må du krysse av for dette i felt 2.4. Aksjeselskap og somme andre selskapstypar skal avviklast etter reglane i selskapslovgivinga, medan andre einingar skal slettast når all verksemd er avvikla for godt. Merk spesielt at felt 2 i del 2 på blanketten òg må fyllast ut når endringa omfattar overtaking, overdraging eller nedlegging/opphøyr av meirverdiavgiftspliktig verksemd.

2.1 Eining som ikkje er registrert tidlegare

Her skal det kryssast av berre dersom eininga ikkje er registrert i Einingsregisteret tidlegare.

Alle einingar som tidlegare har registrert seg direkte i Føretaksregisteret, Meirverdiavgiftsregisteret, arbeidsgivardelen av Arbeidsgivar- og arbeidstakarregisteret, Statistisk sentralbyrå sitt bedrifts- og føretaksregister, Stiftelsesregisteret eller Skattemanntalet for etterskotspliktige, er i dag òg innførde i Einingsregisteret.

Dersom du registrerer ei ny eining i samband med at du overtek ei eksisterande verksemd, kryssar du i tillegg av for kjøp/overtaking av verksemd i felt 9a. Felt 10 skal fyllast ut med opplysningar om den tidlegare eigaren av verksemda. Dersom du vil registrere ei ny eining i samband med at du startar ei ny verksemd, skal du føre opp datoen for start av verksemda i felt 9a på blanketten.

Merk:
Det oppstår inga ny eining dersom det berre har vore eigarskifte av aksjar/partar i eit aksjeselskap eller eit ansvarleg selskap e.l. I slike tilfelle skal ikkje eininga sende melding om ny eining, men melde eventuell endring i dei opplysningane som er registrerte om eininga. Eit ansvarleg selskap skal i slike tilfelle sende melding om endring av deltakarar.

2.2 Endringar/nye opplysningar

Dersom eininga er registrert i Einingsregisteret frå før, skal det i dei fleste tilfelle kryssast av i felt 2.2, Endringar/nye opplysningar. Det gjeld sjølv om eininga gjennom meldinga søkjer om å bli registrert i eit av registra som er tilknytt Einingsregisteret, der eininga ikkje står registrert frå før. Dersom til dømes eit enkeltmannsføretak allereie er registrert i Einingsregisteret og så sender inn melding om registrering i Føretaksregisteret, skal det kryssast av for "Endringar/ nye opplysningar".

Gjeld endringa/den nye opplysninga vedtak om å oppløyse eller slette eininga, skal det kryssast av i eigne rubrikkar.

Fyll alltid ut med organisasjonsnummeret for eininga og registrert namn/firma i felt 1.1. Fyll elles berre ut dei felta endringa gjeld.

Inneber endringa at registrert opplysning skal slettast utan at ho blir erstatta med nye opplysningar, skriv du "går ut" i det aktuelle feltet.

For einingar som er registrerte i Føretaksregisteret, er det gebyr på visse endringar med heimel i rettsgebyrlova § 24. Dette gjeld endringar som skal kunngjerast, det vil seie

• endring av namn/føretaksnamn
• vedtak om oppløysing
• kapitalnedsetjing
• endring av ansvarleg(e) deltakar(ar)
• fusjonsplan og fisjonsplan

2.3 Vedtak om oppløysing av eining

For dei fleste selskapstypane som er registrerte i Føretaksregisteret, skal dette feltet brukast når ein skal avvikle selskapet. Mellom anna for aksjeselskap, allmennaksjeselskap, kommandittselskap, ansvarleg selskap og interkommunalt selskap skjer oppløysing og avvikling i to trinn. Eit selskap som er meldt oppløyst, kan ikkje slettast før kreditorfristen har gått ut og avviklingsrekneskapen er godkjend av kompetent organ.

Avkryssingsrubrikken skal òg brukast når det er teke avgjerd om oppløysing for fusjon og fisjon. Vedtak om oppløysing blir kunngjort av Føretaksregisteret, og derfor er det gebyr på det.

Dei fleste andre organisasjonsformene blir sletta utan varsel på førehand. Dette gjeld enkeltpersonføretak, selskap med avgrensa ansvar, partreiarlag, kommunale føretak, fylkeskommunale føretak, stiftingar, foreiningar og andre innretningar. Sjå rettleiinga til felt 2.4.

2.4 Sletting av eining

Feltet nyttast dersom eininga skal slettast frå alle register (Einingsregisteret og dei tilknytte registra). Ver merksam på at når du vil slette ei eining og samstundes registrere ei ny, skal det fyllast ut to blankettar.

Hugs å føre opp i felt 9b kva som skjer med verksemda til eininga.

Sletting berre frå tilknytta register:

Det er fullt mogleg å bli sletta frå eitt av registra som er knytte til Einingsregisteret, utan å slette seg frå Einingsregisteret og/eller andre tilknytte register.

Sletting i Meirverdiavgiftsregisteret: Skal meldast som opphøyr/nedlegging i
del 2.

Sletting i Føretaksregisteret: Dei fleste organisasjonsformene blir sletta fordi dei ikkje eksisterer lenger. Derfor skal dei slettast frå alle register. For selskap med avgrensa ansvar, stiftingar, foreiningar og andre innretningar gjeld det at dei skal slettast frå Føretaksregisteret når næringsverksemda er nedlagd for godt.

Enkeltpersonføretak, som har registreringsrett, men ikkje registreringsplikt i Føretaksregisteret, kan òg slettast frå Føretaksregisteret utan at dei har slutta å eksistere. Dersom eininga i slike tilfelle framleis vil eller skal stå registrert i Einingsregisteret, må melding om særskild sletting frå Føretaksregisteret førast opp i felt 28. Det skal i så fall ikkje kryssast av for sletting i felt 2.4 på blanketten.

3 Registrering i andre register

Her gir du opp kva for eit tilknytt register eininga skal registrerast i. Felt 3 skal fyllast ut når eininga skal registrerast i eit tilknytt register ho ikkje er registrert i frå før. (Felt 3.3 og 3.4 gjeld registrering av opplysningar i høvesvis arbeidsgivardelen av Arbeidsgivar- og arbeidstakarregisteret og Statistisk sentralbyrå sitt Bedrifts- og føretaksregister.)

Stiftingar:
Blanketten inneheld ikkje noko eige avkryssingsfelt for registrering i Stiftelsesregisteret. Det blir automatisk meldt frå til desse registra om alle stiftingar som melder registrering til Einingsregisteret.

3.1 Føretaksregisteret

Gebyr

Det skal betalast gebyr for registrering i Føretaskregisteret, jf. rettsgebyrlova § 24. Satsane blir fastsett av Stortinget frå år til år.

Kva for einingar skal registrerast i Føretaksregisteret?

Somme av organisasjonsformene har etter lova registreringsplikt eller -rett i Føretaksregisteret. Sjå tilvisingane i felt 8 i blanketten.

Enkeltpersonsføretak pliktar å registrere seg i Føretaksregisteret dersom dei sysselset meir enn fem fast tilsette i hovudstilling eller driv handel med varer som er innkjøpte for vidare sal. Med hovudstilling meiner vi stilling der det blir arbeidd meir enn 20 timar i veka. Enkeltpersonføretak som ikkje pliktar å registrere seg i Føretaksregisteret, har likevel rett til å registrere seg der.

Eigarseksjonssameiger, som er seksjonerte etter krav som er sette fram etter 01.01.1998, pliktar å registrere seg i Føretaksregisteret dersom dei har ni eller fleire seksjonar. Eigarseksjonssameiger med åtte eller færre seksjonar har registreringsrett i Føretaksregisteret. Eigarseksjonssameiger, som er seksjonerte etter krav som er sette fram før 01.01.1998, er ikkje registreringspliktige i Føretaksregisteret, men har rett til å registrere seg der.

Aksjeselskap, allmennaksjeselskap, kommandittselskap, ansvarlege selskap o.l. skal alltid registrere seg i Føretaksregisteret.

Andre organisasjonsformer, som selskap med avgrensa ansvar, stiftingar og foreiningar, skal berre registrerast i Føretaksregisteret dersom dei driv næringsverksemd. Med næringsverksemd meiner vi verksemd som varer ei viss tid og har eit visst omfang, og som er oppretta med tanke på å gi, eller som faktisk gir økonomisk avkasting. Utanlandske einingar skal registrerast i Føretaksregisteret dersom dei driv næringsverksemd her i landet eller på norsk kontinentalsokkel.

Sjå elles oversikta i felt 8 i blanketten eller underi «Hjelp til reglverk» i Altinn.

Hugs å leggje ved nødvendige vedlegg, jf oversikta på side 20. Dersom vedlegg manglar, blir ikkje føretaket registrert.

3.2 Meirverdiavgiftsregisteret

Dei som har verksemd med omsetning som kjem inn under føresegnene i lov om meirverdiavgift, pliktar å vere registrerte i Meirverdiavgiftsregisteret. Sjå brosjyren "Meirverdiavgift - Investeringsavgift, Rettleiing til næringsdrivande" som du kan få frå fylkesskattekontoret eller «Hjelp til regelverk» i Altinn.

3.3 Arbeidstakarar/andre som mottek vederlag

Arbeidstakarar
Som arbeidstakar reknar ein alle som er tilsette i teneste hos andre for løn eller anna godtgjersle.

Andre enn arbeidstakarar som mottek vederlag det skal betalast arbeidsgivaravgift av
Det kan vere oppdragstakarar, frilansarar og andre som ikkje står i noko tilsetjingsforhold til arbeidsgivar, men som likevel mottek løn eller andre godtgjersler som det skal betalast arbeidsgivaravgift av. Som døme på frilansarar kan vi nemne kunstnarar, visse grupper journalistar og andre som ikkje kan reknas som tilsette. Vidare omfattar gruppa personar som mottek ulike former for løn, provisjon, honorar eller anna godtgjersle som medlemmer i styre, råd o.a.

Sjølvstendig næringsdrivande høyrer ikkje inn under denne gruppa.

Einingar som svarar "ja" på at dei har arbeidstakarar og/eller betaler andre enn arbeidstakarar vederlag som det skal svarast arbeidsgivaravgift av, blir kontakta av Rikstrygdeverket eller trygdekontoret etter første gongs registrering i Einingsregisteret. Derifrå får dei nærmare informasjon om Arbeidsgivar- og arbeidstakarregisteret. Dei får òg tilsend særskild blankett for registrering av arbeidstakarar. Det same gjeld alle som seinare melder frå til Einingsregisteret om at dei kjem til å få tilsette eller engasjere frilansarar/oppdragstakarar o.l.

3.4 Verksemd på fleire stader

Einingar som melder at dei har eller vil få verksemd på fleire stader, blir kontakta av Einingsregisteret om tilleggsopplysningar som må sendast inn.

4 Adressa til hovudkontoret (forretningsadresse/besøksadresse)

Næringsdrivande einingar: Gi opp forretningsadresse. Med dette meiner vi gateadressa til hovudkontoret eller stadadresse på mindre stader.

Utanlandske einingar: Gi opp forretningsadressa til hovudføretaket.

Europeisk økonomisk føretaksgruppe: Skal adressa flyttast ut av landet, må framlegg om dette registrerast slik at det kan bli kunngjort. Føretaksregisteret sørgjer for kunngjeringa, som det er gebyr på. Bruk felt 28 i blanketten for å melde om slikt framlegg.

Konkursbo: Gi opp forretningsadressa til konkursdebitor.

Andre einingar: Gi opp besøksadressa til eininga.

5 Postadresse

Einingar som har ei særskild postadresse, til dømes postboks, gir opp den i tillegg til forretningsadressa/besøksadressa til hovudkontoret.

Konkursbo: Gi opp postadressa til bustyraren.

Utanlandsk eining med norsk representant: Gi opp adressa til den norske representanten som postadresse.

6 Gateadressa til verksemda

Dersom verksemda til eininga går føre seg på ei anna adresse enn adressa til hovudkontoret, gir du opp verksemdadressa her. Dersom verksemda ikkje skjer i bestemte lokale eller på faste plassar, men er ambulerande (t.d. bygg- og anleggsverksemd eller transportverksemd), skal du gi opp adressa på den staden der verksemda blir administrert, ev. fast frammøtestad.

Blir verksemda driven på fleire stader, skal det kryssast av for det i felt 3.4. Eininga får da vidare informasjon om korleis dette skal meldast. Fyll i så fall ikkje ut noko i felt 6.

7 Innsendar/gebyransvarleg

Innsendaren vil bli brukt som adressat for alle typar tilbakemeldingar om meldinga - det vil seie at stadfestingar og andre brev, registerutskrifter o.l. blir sende til den som er oppgitt som innsendar. Innsendaren er òg ansvarleg for å betale gebyr til Føretaksregisteret. Dersom innsendarfeltet ikkje er utfylt, blir tilbakemeldingar, krav om gebyr o.l. sende til eininga.

Dersom innsendaren tidlegare har fått tildelt kundenummer av Brønnøysundregistra, skal dette nummeret førast opp.

Saksreferanse for innsendar/attention: Her kan innsendaren gi opp eigen referanse for saka dersom det er ønskjeleg.

8 Organisasjonsform

Feltet skal fyllast ut berre ved melding om ny eining. Kryss av for den organisasjonsforma som skal registrerast. Eininga kan berre setje kryss for eitt av alternativa. Ei eining kan som hovudregel ikkje endre organisasjonsform utan å gå vegen om sletting og nystifting.

Kva for organisasjonsformer som har plikt eller rett til registrering i Føretaksregisteret, går fram av tilvisningane i feltet og rettleiinga til felt 3.1.

Enkeltpersonføretak:
Enkeltpersonar som driv næringsverksemd, skal krysse av for enkeltpersonføretak.

Enkeltpersonar som ikkje driv næringsverksemd, men som har tilsette (t.d. praktikant) skal krysse av for "Anna".

Alle utanlandske einingar, også dei som ikkje har norsk avdeling/representant, kryssar av i rubrikken for utanlandsk eining med norsk avdeling/representant.

9a Stifting av eining. Start eller kjøp av verksemd

Dato for stifting

Gi opp dato da eininga vart stifta.

For eldre einingar som ikkje har nøyaktige opplysningar om dato for stifting, er det nok å gi opp stiftingsåret.

Ein må òg gi opp stiftingsdato for utanlandske einingar.

Enkeltpersonføretak skal ikkje gi opp stiftingsdato.

Start av verksemd

Einingar som startar verksemd, skal gi opp dato for når aktivitetane blei starta/skal starte.

Kjøp av verksemd

Gjeld meldinga kjøp av ei verksemd - t.d. ved at eit aksjeselskap tek over ein skobutikk eller frisørsalong frå eit anna aksjeselskap, skal dato for overtakinga førast opp her.

Kjøp/sal

For at ei verksemd skal reknast som kjøpt eller seld, skal same verksemd halde fram, men med ei anna eining som eigar. Desse vilkåra må vere oppfylde: Dei aktiva som inngår som nødvendige delar i verksemda, så som råvarer, produksjonsutstyr, varelager, kontraktar o.a., må i si heilhet eller det alt vesentlige overdragast under eitt. Dersom dei aktiva som inngår i verksemda, blir selde særkilt, slik at verksemda ikkje kan halde fram, meldast nedlegging av verksemda.

Aksjesal eller endring av deltakarar i ANS/DA reknast ikkje som kjøp/sal av verksemd.

Ved endring av organisasjonsform, til dømes overgang frå enkeltpersonføretak til aksjeselskap, skal det meldast om kjøp/overtaking av verksemd.

Ver merksam på at når det blir meldt om kjøp/sal av verksemd, vil eventuelle tilsette som er innmeldt på verksemda automatisk bli overført til den overtakande eininga, dersom dei ikkje blir melde ut (via trygdekontoret).

9b Sal eller nedlegging av verksemd

Sal av verksemd

Gjeld meldinga sal av ei verksemd - t.d. ved at eit aksjeselskap overdreg ein skobutikk eller frisørsalong til eit anna aksjeselskap, skal dato for overdraginga gjevast opp her.

Sjå elles rettleiing til 9a om kjøp/sal av verksemd.

Nedlegging/opphøyr av verksemd

Ei verksemd blir lagt ned dersom produksjonen av varer og/eller tenester av ein eller annan årsak opphøyrer fullstendig. Verksemda opphøyrer òg dersom:

• ein ny eigar starter ei heilt ny verksemd eller ny produksjon av varer og/eller tenester i dei same lokala
• ein ny eigar flytter heile den tidlegare verksemda til ei ny adresse i ein annan kommune
• ho flytter til ein annan kommune og det blir starta ei heilt ny verksemd/produksjon av varer og/eller tenester (same eigar).

Dersom verksemda er nedlagd (opphøyrd), kryss av for dette og før opp dato for nedlegginga. Ver merksam på at melding om nedlegging av verksemd ikkje betyr at eininga blir sletta. Ønskjer ein å slette eininga, må det kryssast av for "Sletting av eining" i felt 2.4.

10a Kjøp/overtaking av verksemd frå

Gi opplysningar om den tidlegare eigaren dersom eininga har kjøpt eller overteke ei verksemd. Gi opp organisasjonsnummeret til den tidlegare eigaren dersom det finst.

10b Sal/overdraging av verksemd til

Gi opplysningar om den nye eigaren her dersom eininga har selt/overdrege ei verksemd til ei anna eining. Gi opp organisasjonsnummeret til den nye eigaren dersom det finst.

11 Verksemd/bransje

Opplysningane om kva slag verksemd det gjeld, er grunnlaget for å gi eininga næringskode. Næringskoden blir tildelt etter Standard for næringsgruppering (NOS CI82). Næringskoden blir mellom anna brukt til å lage statistikk der norsk næringsliv/arbeidsmarknad blir omtalt etter næring/bransje. Gi ei så nøyaktig utgreiing som råd om den verksemda som blir driven. Gi derfor opp kva slag varer verksemda produserer, kva slag varer ho sel og/eller tenester ho utfører. Pass særleg på å få klart fram kva for bransje verksemda tilhøyrer.

Ein generell regel innanfor industri er at ein må gi opp kva slag produkt verksemda framstiller. Nedanfor er det gitt døme på kor detaljert framstillinga må vere:

• Jordbruk:
  • Dyrking av jordbruksvekstar
  • Kombinert husdyrhald og planteproduksjon
• Transport:
  
  • Godstransport på veg
  • Rutebiltransport
• Industri:
  
  • Produksjon av hushalds-, sanitær- og toalettartiklar av papir
  • Produksjon av byggjevarer av plast
• Handel:
  
  • Agenturhandel med tømmer, trelast og byggevarer
  • Engroshandel med elektriske hushaldsapparat
  • Butikkhandel med kjøtt og kjøttvarer
• Bygg og anlegg:
  
  • Oppføring av bygninger
  • VVS-arbeid

Einingar som ikkje driv næringsverksemd, gir opp den aktiviteten dei skal drive. Døme kan vere musikkorps, idrettslag.

Utanlandske einingar gir opp den (nærings)verksemda dei driv med i Noreg, eventuelt kva som er grunnlaget for registreringa.

12 Dagleg leiar, innehavar, forretningsførar eller annan kontaktperson

Dersom kontaktperson ikkje blir oppgitt, blir eininga ikkje registrert.

Enkeltpersonføretak gir alltid opp innehavar. Med innehavar meiner vi den personen som har uavgrensa personleg ansvar for pliktene til enkeltpersonføretaket. Gi òg opp dagleg leiar dersom eininga har det.

Utanlandsk eining med norsk avdeling gir opp dagleg leiar for verksemda i Noreg, dersom slik leiar er vald, og dessutan innehavaren av hovudføretaket, dersom det er organisert som eit enkeltpersonføretak.

Utanlandsk næringsdrivande utan forretnings- eller heimstad i Noreg gir opp den norske meirverdiavgiftsrepresentanten for eininga. Er den norske representanten ein juridisk person, gi opp i tillegg ein kontaktperson.

Andre utanlandske einingar må gi opp kontaktperson.

Stiftingar gir opp namnet til kontaktpersonen, fødselsnummer, adresse og telefonnummeret til kontaktpersonen på dagtid.

Andre organisasjonsformer gir opp dagleg leiar eller forretningsførar. Med dagleg leiar/forretningsførar meiner vi den personen som har den daglege administrative leiinga av eininga, og som har styringsmakt til å representere eininga utetter i forhold som fell inn under den daglege leiinga.

Er dagleg leiar/forretningsførar ein juridisk person, skal ein i tillegg gi opp ein kontaktperson.

Dersom eininga ikkje har dagleg leiar/forretningsførar, skal ein gi opp ein annan kontaktperson.

Fødselsnummer/D-nummer/organisasjonsnummer

Enkeltpersonar: Pass på å få med fødselsnummer i tillegg til namn og bustadadresse (jf einingsregisterlova § 7).

Juridiske personar: Gi opp organisasjonsnummer og forretningsadresse.

Utanlandske personar: Gi opp D-nummer - det vil seie eit eige nummer som identifiserer utanlandske personar utan norsk fødselsnummer.

Tildeling av D-nummer

Sentralkontoret for folkeregistrering deler ut nummeret. I tilfelle det manglar, skal det rekvirerast av det registeret som har behov for D-nummeret, til dømes fylkesskattekontora, Brønnøysundregistra eller andre. Før D-nummer kan rekvirerast, må det leggjast ved stadfesta kopi av gyldig pass. Vi tilrår at blanketten "Oppmoding om tildeling av D-nummer" blir nytta. Den får du om du kontaktar Brønnøysundregistra.

Merk at fødselsnummer/D-nummer berre er til intern bruk. Desse numra kan ikkje offentleggjerast, jf. § 22 i einingsregisterlova.

13 Reklame

Eininga kan samtykkje i at dei registrerte opplysningane om namn og adresse kan brukast til å sende ut adressert reklame, publikasjonar og liknande ved å krysse av for ja i dette feltet. Dersom det ikkje blir kryssa av i ja-rubrikken, blir det registrert som eit nei. Alle som får tilgang til desse opplysningane i Einingsregisteret, får da melding om at eininga har reservert seg mot at opplysningane blir brukte til å sende ut direkte adressert reklame.

14 Ønske om målform

Skriftleg kommunikasjon frå Einingsregisteret til eininga kjem på den målforma som er kryssa av her.

15 Vedtekter/selskapsavtale

Gi opp dato da vedtektene/selskapsavtalen vart fastsette eller endra.

Feltet gjeld ved registrering i Føretaksregisteret og Stiftelsesregisteret, og må fyllast ut av alle organisasjonsformer bortsett frå enkeltmannsføretak.

Vedtektene/selskapsavtalen må leggjast ved i samband med nyregistrering. Ved seinare endringar av vedtektene/selskapsavtalen må det leggjast ved eit ajourført eksemplar.

16 Kapital i aksjeselskap, allmennaksjeselskap, kommandittselskap og stiftingar

I øvste delen av feltet melder du kapital ved registrering av aksjeselskap, allmennaksjeselskap, kommandittselskap og stiftingar.

Her melder du òg kapitalendringar, til dømes kapitalauke, gjennomføring av kapitalnedsetjing og innbetaling av kapital i kommandittselskap. I avkryssingsfelta skal det merkast av kva kapitalendringa gjeld. Du skal dessutan krysse av for om kapitalteikninga er omfatta av meldeplikta til Oslo Børs etter verdipapirhandellova § 5-7 eller meldeplikta til Føretaksregisteret etter verdipapirhandellova § 5-8. Det er ho i dei tilfella der teikningsinnbydinga er større enn 40 000 ECU og er retta mot fleire enn 50 personar, jf verdipapirhandellova § 5-1. Det er ein føresetnad at prospektet allereie er registert hos Oslo Børs eller i Føretaksregisteret. Dersom prospektet er registrert hos Oslo Børs, må det leggjast ved prospekt og anna teikningsmateriale. Det må òg leggjast ved kopi av brev frå Oslo Børs om at prospektet er registrert, eller stadfesting frå dei meldepliktige om at prospekt er send til Oslo Børs.

Aksjeselskap og allmennaksjeselskap må gi nærmare opplysningar i felt 28 i blanketten - "Andre merknader/opplysningar" når kapitalforhøginga skjer på grunnlag av styrefullmakt som er skrive ut, konvertibelt lån, teikningsrettsaksjar eller frie teikningsrettar. (Sjå rettleiinga til felt 28).

Heile aksjeinnskotet må vere innbetalt før registrering i Føretaksregisteret.

Utanlandske einingar med norsk avdeling: Gi opp aksjekapitalen og kor mykje av han som er innbetalt, dersom hovudføretaket er eit aksjeselskap. Før opp kapitalen i valutaen til det aktuelle landet.

Sparebankar som har skrive ut omsetjelege grunnfondsbevis, gir opp grunnfondsbeviskapitalen i felt 28 - "Andre merknader/opplysningar".

Stiftingar: Grunnkapitalen skal givast opp i rubrikken for "Kapital i samsvar med vedtekter/selskapsavtale". I tillegg skal ein gi opp forvaltingskapitalen i stiftinga (summen av eigenkapital og framandkapital) i felt 28 - "Andre merknader/opplysningar".

17 Vedtak om kapitalnedsetjing i aksjeselskap, allmennaksjeselskap og kommandittselskap

I feltet melder du vedtak om kapitalnedsetjing som grunnlag for eventuelt kreditorvarsel. Avkryssing for kva nedsetjinga skal brukast til , må vere i samsvar med protokoll. Gjennomføring av kapitalnedsetjing etter at kreditorfristen har gått ut, skal meldast i felt 16.

Bruk felt 19 til å melde kapitalnedsetjing i samband med fisjon.

18 Fusjon

Dette feltet skal brukast av aksjeselskap, allmennaksjeselskap og andre einingar som med heimel i lov kan fusjonerast.

Dersom fusjonen følgjer særreglane for fusjon mellom morselskap og heileigd dotterselskap, jf. aksjelova § 13-23 og allmennaksjelova § 13-24, eller mellom to heileigde dotterselskap, jf. aksjelova § 13-24, kryssar ein av for dette.

I øvste delen av feltet skal det kryssast av for om meldinga gjeld overdraging, det vil seie oppløysing for fusjon, eller overtaking av eit selskap. Ved melding om oppløysing for fusjon skal det òg kryssast av for vedtak om oppløysing av eining i felt 2.3. Både det selskapet som overdreg og det selskapet som tek over, må levere inn melding.

Fyll ut feltet med namn/føretaksnamn, organisasjonsnummer og adresse til det selskapet som er med i fusjonen.

I nedste delen av feltet skal allmennaksjeselskap opplyse om meldinga gjeld fusjonsplan.

Etter at kreditorfristen har gått ut, må det leverast inn melding om gjennomføring av fusjonen for alle dei selskapa som er med.

19 Fisjon

Dette feltet skal brukast av aksjeselskap, allmennaksjeselskap og andre einingar som med heimel i lov kan fisjonerast.

I første delen av feltet skal det selskapet som skal delast, opplyse om fisjonen inneber kapitalnedsetning eller oppløysing. Kryss av for "Kapitalnedsetjing i samband med fisjon" når det selskapet som dreg over, berre skal overdra ein del av dei samla eignelutene, rettane og pliktene sine til eitt eller fleire overtakande selskap. Dersom overdragande selskap skal overdra alle sine eigneluter, rettar og plikter til to eller fleire overtakande selskap, set ein kryss for "Oppløysing for fisjonere med". Ved melding om opplysing for fisjon skal det òg kryssast av for vedtak om oppløysing av eining i felt 2.3.

Det eller dei selskapa som tek over, kryssar av for å overta. Både det overdragande og det/dei overtakande selskapa må levere inn melding.

Fyll ut feltet med namn/føretaksnamn, organisasjonsnummer og adresse til det/dei selskapet(a) som er med i fisjonen. Dersom det ikkje er plass, kan du bruke felt 28 - "Andre merknader/opplysningar"

Etter at kreditorfristen har gått ut, må ein sende inn melding om gjennomføring av fisjonen for alle dei selskapa som er med.

I nedste delen av feltet skal allmennaksjeselskap opplyse om meldinga gjeld fisjonsplan.

20 Styre, deltakarar o.a.

Registrering i Einingsregisteret:
Feltet skal fyllast ut dersom eininga har styre, deltakarar, sameigarar, komplementar eller eigarkommune.

Registrering i Føretaksregisteret:
Desse einingane må ha styre:

• aksjeselskap
• allmennaksjeselskap
• burettslag
• bustadbyggjelag
• eigarseksjonssameiger
• gjensidige forsikringsselskap
• stiftingar
• sparebankar
• statsføretak
• foreiningar/lag/innretningar
• interkommunale selskap
• kommunale føretak
• fylkeskommunale føretak

Ansvarleg selskap, kommandittselskap og partreiarlag gir opp styre dersom selskapet har det.
Utanlandsk eining med norsk avdeling: Dersom det er valt særskilt styre for avdelinga i Noreg, skal det givast opp. Styre og/eller ansvarlege deltakarar i hovudføretaket skal givast opp i felt 28 - "Andre merknader/opplysningar".
Europeisk økonomisk føretaksgruppe kan ikkje registrere styre med mindre det er eit avviklingsstyre.

Gi opp heile styret (leiar i styret, nestleiar, styremedlemmer, varamedlemmer) både ved nyregistrering og ved seinare endringar. Bruk eige vedlegg dersom det ikkje er plass til alle styremedlemmene i blanketten. Pass på å gi opp tilleggsopplysningar i samband med styrevalet i rubrikken for spesielle opplysningar, til dømes om styremedlemmene er valde av A-, B- eller C-aksjonærar.

Desse einingane må gi opp deltakarar:

• ansvarleg selskap
• partreiarlag
• interkommunalt selskap

Gi opp alle deltakarane både ved nyregistrering og ved seinare endringar. Bruk eige vedlegg dersom det ikkje er plass til alle deltakarane i blanketten.

Kommunale og fylkeskommunale føretak må gi opp eigarkommune.

Ansvarleg selskap med delt deltakaransvar og interkommunalt selskap gir opp ansvarsdel i prosent eller brøk i feltet ansvarsdel. Kommandittselskap gir opp komplementar.

Rolleinnehavarar kan vere personar eller i somme tilfelle juridiske personar. Fyll ut med namn/firma, adresse (postnummer og - stad) og fødselsnummer eller organisasjonsnummer, jf einingsregisterlova §7. Utanlandske personar gir opp D-nummer. (D-nummer: sjå rettleiinga til felt 12. Fødselsnummer/D-nummer er berre til intern bruk, og blir ikkje offentleggjort, jf. einingsregisterlova § 22.)

Kva slag dokumentasjon som må leggjast ved, følgjer av oversikta over nødvendige vedlegg ved registrering og endring i høvesvis Einingsregisteret og Føretaksregisteret.

21 Signatur

Feltet skal fyllast ut dersom eininga har fått tildelt signatur. Signatur er ei fullmakt til å opptre og skrive under på vegne av eininga i forretningsforhold. Signaturrett kan givast til rolleinnehavar(ar), namngitte personar eller einingar.

Gi opp kven som har fått signaturrett, ved å krysse av for rett alternativ. Dersom ingen av standardalternativa passar, kan signaturføresegna førast opp under "Anna signaturføresegn".

Dersom signatur er gitt til namngitte personar, må det førast opp under "Anna signaturføresegn", med opplysning om namn, adresse og fødselsnummer. Utanlandske personar gir opp D-nummer. (D-nummer: sjå rettleiinga til felt 12. Fødselsnummer/D-nummer er berre til intern bruk, og blir ikkje offentleggjort, jf. § 22 i einingsregisterlova.)

Det må presiserast om signatur gjeld kvar for seg eller i fellesskap dersom fleire har signatur. Pass på at signaturføresegna som blir meld, er i samsvar med eventuelle vedtekter/selskapsavtale for eininga.

Utanlandsk eining med norsk avdeling: Dersom dagleg leiar og/eller styret i den norske avdelinga har fått signatur, skal det givast opp. Signaturen kan ikkje avgrensast til berre å gjelde den norske avdelinga. Signaturføresegn for hovudføretaket gir ein opp i felt 28 - "Andre merknader/opplysningar".

Ved endring må ein gi opp alle som har signaturrett etter endringa.

22 Prokura

Fyll ut feltet dersom eininga har tildelt prokura.

Prokura er ei fullmakt på same måten som signatur, men er ikkje like omfattande. Prokuristen kan ikkje utan uttrykkjeleg fullmakt, overdra eller leggje hefte på den faste eigedomen til eininga eller lausøyre som kan registrerast i skipsregisteret eller luftfartøyregisteret, eller opptre på vegne av eininga i søksmål.

Er prokura gitt til namngitte personar, skal ein føre dette opp under "Anna prokuraføresegn", med opplysning om namn, adresse og fødselsnummer. Utanlandske personar gir opp D-nummer. (D-nummer: Sjå rettleiinga til felt 12. Fødselsnummer/D-nummer er berre til intern bruk, og blir ikkje offentleggjort, jf. § 22 i einingsregisterlova.) Det må presiserast om prokura gjeld kvar for seg eller i fellesskap.

Ved endring må ein gi opp alle prokuristane etter endringa.

Utanlandsk eining med norsk avdeling: Dersom dagleg leiar og/eller styret i den norske avdelinga har fått prokura, skal ein gi opp det. Prokuraretten kan ikkje avgrensast til berre å gjelde den norske avdelinga.

23 Revisor

Registreringa i Einingsregisteret: Feltet må fyllast ut dersom eininga har revisor.

Registrering i Føretaksregisteret: Som hovudregel gjeld at føretaket må ha revisor. Dersom det ikkje er heimla i lov eller forskrift gitt med heimel i lov, er det ikkje revisorplikt dersom eininga har fem eller færre ansvarlege deltakarar og/eller årsomsetning under 5 millionar kroner.

Spesielle krav:
Revisor må vere godkjend av Finanstilsynet og registrert i Revisorregisteret.

Desse selskapa kan ha revisor som ikkje er registrert i Revisorregisteret:

• interkommunale selskap
• kommunale føretak
• fylkeskommunale føretak

Utfylling:
Feltet skal fyllast ut med namn/firma, adresse og organisasjonsnummer til revisoren, jf. § 7 i einingsregisterlova.

Merk at feltet har plass for underskrifta til revisor. Dersom revisor skriv under i det feltet er det ikkje nødvendig å leggje ved særskild viljeserklæring. Dersom det er nødvendig med stadfesting av innbetalt kapital, må det leggjast ved eiga erklæring om det.

24 Rekneskapsførar

Spesielle krav:
Rekneskapsførar må vere autorisert av Finanstilsynet og registrert i Rekneskapsførarregisteret.

Utfylling:
Feltet må fyllast ut med rekneskapsføraren sitt namn/firma, adresse og organisasjonsnummer. Gi opp fødselsnr./D-nummer dersom rekneskapsføraren ikkje har registreringsrett i Einingsregisteret.

Merk at feltet har plass for underskrifta til rekneskapsføraren. Dersom rekneskapsføraren skriv under i det feltet, er det ikkje nødvendig å leggje ved viljeserklæring.

25 Norsk avdeling av utanlandsk eining

Utanlandsk eining med norsk avdeling: Gi opp namn/føretaksnamn på den norske avdelinga og forretningsadressa. Avdelinga i Noreg kan ha særskilt namn/føretaksnamn eller same namn/føretaksnamn som hovudføretaket.

26 Offentlege eller utanlandske eigardelar

Kryss av dersom eininga har heilt eller delvis offentlege eller utanlandske eigarar. Einingar som svarer ja, blir kontakta og får nødvendig informasjon om tilleggsopplysningar dei må sende inn. Opplysningar om eigardelar skal brukast til å fastsetje den institusjonelle sektorkoden for eininga. Dette er ein internasjonal standard som Statistisk sentralbyrå har bruk for i statistikkarbeidet sitt - mellom anna i nasjonalrekneskapen og i samband med rekneskapsstatistikk.

27 Konsern/føretaksgruppe

Einingsregisteret skal innehalde opplysningar om einingar som er med i konsern eller føretaksgruppe, jf. § 6 i einingsregisterlova, første ledd bokstav k. Einingar som er med i konsern eller føretaksgruppe, har plikt til å melde visse opplysningar til Einingsregisteret, jf. forskrift av 9. februar 1995 om registrering av juridiske personar m.m. i Einingsregisteret. Kryss av dersom eininga er med i konsern/føretaksgruppe, eller dersom det har skjedd endringar i konsernstrukturen. Eininga vil da få vidare informasjon om korleis dette skal meldast.

28 Andre merknader/opplysningar

Her fører du opplysningar som ikkje kan meldast i dei andre felta på blanketten. Legg ved særskilt ark dersom det blir for liten plass. Døme på opplysningar som skal meldast her, er:

Aksjeselskap og allmennaksjeselskap:

• styrefullmakt til å setje opp aksjekapitalen ved nyteikning*
• styrefullmakt til kjøp av eigne aksjar til eige eller pant
• styrefullmakt til kjøp av aksjar i morselskap til eige eller pant
• styrefullmakt til å ta opp lån med rett til å krevje at aksjar blir skrivne ut (konvertibelt lån)
• vedtak om opptak av lån med rett til å krevje at aksjar blir skrivne ut (konvertibelt lån)*
• nedsetjing av overkursfond
• utdeling av utbytte
• utdeling av konsernbidrag
• meldepliktig transaksjon mellom aksjonær og selskapet
• meldepliktig transaksjon mellom selskap innanfor same konsernet

I tillegg bruker du fritekstfeltet av allmennaksjeselskap ved melding om:

• vedtak om å skrive ut teikningsrettsaksjar*
• vedtak om å skrive ut frittståande teikningsrettar*

*Ved melding om kapitalutviding på grunnlag av styrefullmakt, konverteringa av lån, utskrivne teikningsrettsaksjar eller frittståande teikningsrettar, må ein gi opplysningar om dato for når styrefullmakta vart gitt/lånet vart teke opp/teikningsrettsaksjane eller teikningsrettane vart skrivne ut.

Dersom den melde kapitalutvidinga byggjer på ulike grunnlag (t.d. styrefullmakt og konvertering av lån), må det i tillegg spesifiserast korleis kapitalutvidinga fordeler seg på de ulike grunnlaga.

Europeisk økonomisk føretaksgruppe: framlegg om flytting av offisiell adresse til annan EØS-stat.

Stiftingar: om forvaltningskapitalen til stiftinga.

Sparebankar som har skrive ut omsetjelege grunnfondsbevis, fører opp grunnfondsbeviskapitalen.

Utanlandske einingar som driv næringsverksemd i Noreg med norsk avdeling/meirverdiavgiftsrepresentant, skal gi opp desse opplysningane om hovudføretaket:

• organisasjonsform
• registreringsnummer og namnet til registeret, dersom hovudføretaket er registrert i eit offentleg føretaksregister i heimlandet sitt
• ansvarlege deltakarar/styre i hovudføretaket*
• kven som teiknar hovudføretaket (signatur)*

*Gi opp D-nummer - det vil seie eit eige nummer som identifiserer utanlandske personar utan norsk fødselsnummer.

D-nummer blir tildelt av Sentralkontoret for folkeregistrering. Dersom det ikkje finnst, skal det rekvirerast av det registeret som treng D-nummeret, t.d. fylkesskattekontora eller Brønnøysundregistra. Før D-nummer kan rekvirerast, må det leggjast ved stadfesta kopi av gyldig pass. Vi tilrår at blanketten "Oppmoding om tildeling av D-nummer" blir brukt. Denne blanketten får du om du kontaktar Brønnøysundregistra. Merk at fødselsnummer/D-nummer berre er til intern bruk. Desse numra kan ikkje offentleggjerast, jf. § 22 i einingsregisterlova.

Offentleg sektor gir opp namn og organisasjonsnummer til overordna eining.

For alle organisasjonsformer:

• Eigenavgang i samsvar med § 4-6 i føretaksregisterlova og § 15a i einingsregisterlova. Opplys kva rolle(r) ein melder avgang om. Melding om eigenavgang frå rolle som ansvarleg deltakar skal kunngjerast, og derfor er det knytt gebyr til. Sjå rettleiinga til felt 2.2.
• Særskild sletting frå Føretaksregisteret. Sjå rettleiinga til felt 2.4.

29 Underskrifter

Meldinga må vere underskriven for at ho skal bli godkjend.
Dei som skriv under meldinga, stadfestar at opplysningane som er gitt er rette, og at dei er kjende med at det er straffbart å gi urette opplysningar, jf. § 189 i straffelova.

Kven som skal skrive under meldinga, avheng av kvar eininga skal registrerast:

Dersom melding berre gjeld Einingsregisteret, skal ho underskrivast av dagleg leiar, forretningsførar eller kontaktperson. For enkeltmannsføretak skal innehavar skrive under. Ved registrering i Stiftelsesregisteret skal meldinga underskrivast av styret.

Registrering i Føretaksregisteret

Melding til Føretaksregisteret skal underskrivast av den/dei med signaturrett eller alle styremedlemmene. Dersom føretaket ikkje har styre, skal meldinga underskrivast av den/dei med signaturrett eller innehavaren i enkeltpersonføretak, alle deltakarar i ansvarleg selskap og komplementaren i kommandittselskap.

Nyvalde styremedlemmer som ikkje har underskrive meldinga, må vedleggje viljeserklæring som stadfestar at dei har teke på seg vervet. Ved nyregistrering og endring av deltakarar i ansvarleg selskap, må deltakarar som ikkje har underskrive meldinga vedleggje samtykkjeerklæring til registrering i Føretaksregisteret.

For norskregistrert utanlandsk føretak skal meldinga underskrivast av den/dei med signaturrett eller av meldepliktige. Det er styret for den norske verksemda som er meldepliktig, eller dagleg leiar dersom det ikkje finst styre.