Opprette og registrere eigarseksjonssameige
Sist oppdatert: 3. juni 2026.
Eit eigarseksjonssameige blir oppretta ved tinglysing av eit seksjoneringskrav.
Registreringsplikt og registreringsrett
Alle eigarseksjonssameige har registreringsrett i Einingsregisteret. Eigarseksjonssameige som er tinglyste etter 1. januar 1998, og som har ni eller fleire seksjonar, skal registrerast i Føretaksregisteret. Sjølv om eigarseksjonssameiget ikkje har plikt til å registrere seg i Føretaksregisteret, har likevel alle rett til å bli registrerte.
Saka blir tatt til behandling av ein saksbehandlar innan ti arbeidsdagar, dersom sameiget skal registrerast i Føretaksregisteret.
Du kan sjå datoen vi har komme til i saksbehandlingskøen vår på sida Når blir saka mi behandla.
Vedleggskrav ved registrering
Når du skal registrere eit eigarseksjonssameige i Føretaksregisteret, må du alltid legge ved
- vedtekter
Vedtektene skal minst innehalde
- grunnboksnemninga til eigedomen
- opplysningar om kor mange medlemmar styret skal ha
Dersom sameiget skal ha ein annan signaturregel enn styret i fellesskap, må vedtektene også innehalde informasjon om dette.
Protokollen skal minst innehalde
- namnet på sameiget som heldt møtet
- opplysningar om når møtet vart halde
- opplysningar om kor mange sameigarar som var representerte
- oversikt over kva for vedtak som er gjorde
- val av styre. For- og etternamn på personane som er valde inn og kva rolle dei skal ha, skal også gå fram av protokollen
Protokollen skal vere underskriven av møteleiar og ein annan som var til stades på møtet. Du kan sladde delar av protokollen ved behov, så lenge minstekrava ikkje er overstrokne og kan kontrollerast av oss.
Hugs å signere i skjemaet
Styremedlemmer, varamedlemmer og eventuelt revisor og rekneskapsførar må stadfeste at dei tar på seg vervet. Dette gjer de ved å signere i skjemaet Registrering i Einingsregisteret og Føretaksregisteret i Altinn.
Kan du ikkje bruke digitalt skjema?
Du kan laste ned skjemaet (PDF), fylle det ut og sende det i posten. Det kan ta vesentleg lengre tid å behandle saker som blir sende i posten.