Roller i NUF
Sist oppdatert: 5. januar 2026.
Her finn du ei oversikt over kva roller eit norskregistrert utanlandsk føretak må registrere hos oss.
Som hovudregel skal alle personar som blir registrert med ei rolle gi opp fullstendig fødselsnummer eller d-nummer. Unntaket er styret og deltakarar i heimlandet. Juridiske personar som har roller skal også gi opp organisasjonsnummer. Døme på juridiske personar er aksjeselskap og ansvarlege selskap.
D-nummer er eit eget nummer som identifiserer utanlandske personar utan norsk fødselsnummer.
Du må bruke dette skjemaet for å søke om d-nummer, skjemaet legg du ved Samordna registermelding. I tillegg må du legge ved originalt stadfesta kopi av gyldig legitimasjonsdokument som inneheld bilde, fullt namn, fødselsdato, kjønn, utløpsdato og statsborgarskap. Informasjon om kven som kan stadfeste kopien av legitimasjonsdokumentet finn du i skjemaet. Kravet om at kopien av legitimasjonsdokumentet må vere originalt stadfesta for å få d-nummer, gjer at du må sende søknaden i posten.
Eit NUF må ha dagleg leiar eller forretningsførar. Føretaket har ikkje plikt til å ha dagleg leiar, men dersom det har dagleg leiar for verksemda i Noreg, må dette meldast.
Kontaktperson skal berre meldast dersom ingen andre fysiske roller finst, og det må stadfestast at kontaktpersonen har tilknyting til det utanlandske føretaket. Stadfestinga skal vere frå det utanlandske føretaket. Dersom det er meldt eit føretak som norsk representant, og den melde kontaktpersonen er tilsett hos representanten, kan representanten stadfeste kontaktpersonen si tilknyting til det utanlandske føretaket.
Spesielt for dagleg leiar, legg ved:
- protokoll som viser avgjerd om at daglig leiar er tilsett, dersom ikkje heile styret har signert i skjemaet.
- erklæring frå dagleg leiar om at hen tar på seg vervet
Utanlandske føretak utan fast forretningsadresse/driftsstad i Noreg, og som kjem inn under meirverdiavgiftslova sine føresegner, må melde norsk representant. Dette kravet gjeld ikkje for føretak heimehøyrande i ein EØS-stat som Noreg har inngått avtale med om utveksling av opplysningar og gjensidig hjelp til inndriving av meirverdiavgiftskrav. I tillegg er det unntak for føretak heimehøyrande i Storbritannia. Andre utanlandske føretak utan fast forretningsadresse i Noreg kan også melde norsk representant.
Kven kan vere norsk representant?
Den norske representanten kan vere ein fysisk eller juridisk person. Representanten må ha heimstad eller ei forretningsadresse i Noreg. Dersom den norske representanten er ein juridisk person, må det i tillegg meldast ein kontaktperson eller dagleg leiar.
Personar med d-nummer og norskregistrerte utanlandske føretak (NUF) utan norsk forretningsadresse kan ikkje vere norsk representant.
Når du skal registrere norsk representant, må du legge ved
- Dokumentasjon frå det utanlandske føretaket som viser oppnemning av den norske representanten
- Stadfesting frå den norske representanten som viser at han har tatt på seg oppdraget
Dersom den norske representanten signerer Samordna registermelding, treng du ikkje å legge ved ei eiga erklæring.
Styre i Noreg
Dersom det er vald eit eige styre for den norske verksemda, skal dette meldast i skjema med namn, adresse og fødselsnummer eller d-nummer på alle styremedlemmer og eventuelle varamedlemmer.
Ved registrering i Einingsregisteret må du legge ved
- Protokoll frå dei i det utanlandske føretaket som har myndigheit til å velje styre for den norske verksemda
Ved registrering i Føretaksregisteret må du legge ved
- protokoll frå dei i det utanlandske føretaket som har myndigheit til å velje styre for den norske verksemda
- originale erklæringar frå dei nye styremedlemmene og varamedlemmene, som viser at dei tar på seg oppdraget
Dersom styremedlemmene og varamedlemmene signerer Samordna registermelding, treng du ikkje å legge ved eigne erklæringar.
Styre i heimlandet
Dersom føretaket har styre i heimlandet, skal alle desse meldast med namn, adresse og fødselsdato.
Deltakarar i heimlandet
Dersom føretaket har deltakarar i heimlandet, skal alle desse meldast med namn, adresse og fødselsnummer.
Om den norske verksemda har eigen autorisert norsk revisor eller rekneskapsførar, må du melde dette i skjema. Revisor eller rekneskapsførar må stadfeste at dei tar på seg oppdraget, dette gjer de ved å signere i skjemaet.
Skal du melde rekneskapsførar og den norske verksemda er registrert i Føretaksregisteret, må du legge ved:
- dokumentasjon som viser at meldt regnskapsfører er engasjert
Signatur er ei fullmakt til å opptre på vegner av selskapet i alle samanhengar.
Prokura er ei fullmakt til å opptre og underskrive på vegner av føretaket i nokre samanhengar. Prokura kan ikkje brukast til å hefte eller selje føretaket sin faste eigedom.
Det registrerast berre prokura på næringsdrivande verksemder.
Kva for signatur og prokura kan registrerast?
Signatur og prokura kan tildelast namngitte personar, dagleg leiar i Noreg eller styret for den norske verksemda. Dersom fleire har signatur eller prokura, må det gå klart fram om dei har retten kvar for seg eller i fellesskap. Vi kan ikkje registrere andre avgrensingar i signatur og prokura. Det tyder at det til dømes ikkje er mogleg å registrere signatur og prokura som berre gjeld for den norske verksemda.
Når du skal melde signatur må du legge ved
- Dokumentasjon som stadfester signatur som er meldt, til dømes registreringsbevis frå heimlandet sitt register, vedtekter eller protokoll frå dei i heimlandet som har myndigheit til å tildele dette