Sletting av samvirkeføretak
Sist oppdatert: 2. januar 2026.
Sletting av eit samvirkeføretak melder du i to trinn.
Først melder du oppløysing. Når kreditorfristen på seks veker er ute, kan du melde sletting.
Hovudregelen er at årsmøtet vedtek at selskapet skal oppløysast.
Ved vedtak om oppløysing skal årsmøtet også velje eit avviklingsstyre. Dette styret vil tre inn for dagleg leiar og det sittande styret. Årsmøtet kan vedta at det sittande styret skal vere avviklingsstyre.
Det er ikkje sett ein absolutt frist for når du må melde oppløysinga til Føretaksregisteret, men ifølge samvirkelova skal dette skje straks avviklingsstyret er vald.
Du må legge ved
- protokoll frå årsmøtet som viser vedtak om oppløysing og val av avviklingsstyre
Dersom det blir vald nye styremedlemmer og varamedlemmer til avviklingsstyret, må desse stadfeste at dei tar på seg oppdraget. Dette gjer dei ved å signere meldinga.
Årsmøtet kan vedta å slette føretaket når kreditorfristen på seks veker er ute.
Ved vedtak om sletting, må årsmøtet godkjenne sluttoppgjeret. For samvirkeføretak som har revisjonsplikt etter revisorlova, skal sluttoppgjeret vere revidert.
Du må legge ved
- protokoll frå årsmøtet som viser at sluttoppgjeret er blitt godkjend
Dersom føretaket har revisjonsplikt etter revisorlova, må det gå fram av protokollen at sluttoppgjeret som blir godkjend er revidert.
Årsmøtet kan gjere om vedtak om oppløysing. Da må eventuelle utdelingar av midlar til medlemmene førast tilbake til føretaket.
Du må raskt melde omgjeringa til Føretaksregisteret.
Ved omgjering må årsmøtet også velje ordinært styre.
Du må legge ved
- protokoll frå årsmøtet som viser vedtak om omgjering av oppløysing og val av styre
Om det blir vald nye styremedlemmer og varamedlemmer til styret må desse stadfeste at dei tar på seg oppdraget. Dette gjer dei ved å signere meldinga.