Hefte på person

Når det er registrert eit salspant i motorvogn, vil det seie at for eksempel banken har tatt sikkerheit i bilen for lånet dei har gitt kjøpar. For å finne ut om det er registrert salspant, kan du søke på hefte i køyretøy.

Når du inngår ein leasingavtale på ein bil, vil det seie at du inngår ein avtale om langtidsleige av bilen. Fordi leasing liknar meir på eit salspantkjøp eller eit kredittkjøp, enn ein leigeavtale, gjeld same reglar som for salspant også for leasing.

Utleggspant er sikkerheit for eit pengekrav som blir stifta med hjelp frå namsmyndigheitene. Utleggspant er sikkerheit for eit pengekrav der saksøkar kan krevje utlegg i saksøkte sine eigedelar. Om det ikkje finst midlar hos saksøkte å ta utlegg i, kan dette føre til utleggstrekk (trekk i lønn/trygd) eller inkje til utlegg.

Inkje til utlegg betyr ingen verdiar å ta pant i.

Om du ikkje gjer opp eit pengekrav frivillig, kan namsmannen pålegge arbeidsgivar eller NAV om å trekke ein fast sum frå lønna eller trygda di (utleggstrekk). Dette for å sikre og realisere kravet.

Opplysningar om inkje til utlegg og utleggstrekk er ikkje offentlege. Dei blir berre gitt til den det gjeld, til advokatar, finansinstitusjonar, inkassobyrå, kredittopplysningsbyrå og offentlege myndigheiter med teieplikt.

Ønsker du å sjå om det er registrert utleggstrekk eller inkje til utlegg på deg sjølv, kan du logge inn på Mi side. Andre aktørar som har lov til å sjå desse opplysningane må bestille dei per telefon. Les meir om prisar og korleis du bestiller stadfesting på utleggstrekk og inkje til utlegg.

Arrest er ei mellombels sikring, og skal sikre eit framtidig oppgjer av eit enno ikkje forfalle pengekrav. Arresten inneber at skyldnar mister retten til å disponere rettsleg over det arresterte formuesgodet, for eksempel ved sal eller pantsetting. Arrest kan takast i kvart formuesgode som det kan takast utleggspant i.

Sjå informasjon frå politiet om arrest.

Vi tinglyser opning av gjeldsforhandling. Denne blir sletta når det blir registrert ei gjeldsordning eller gjeldsforhandlingsperioden er utløpt, utan at det er avtalt frivillig eller tvungen gjeldsordning. Opplysningar om opning av gjeldsforhandling og gjeldsordning finn du i tenesta vår for søk i rettsstiftelser. Tenesta krev innlogging og du må ha fødselsnummeret til personen du søker på.

Innhaldet i gjeldsordningsavtalen er unntatt offentligheita.

Privatpersonar kan vere under frivillig eller tvunge verjemål. Vi tinglyser vedtak om

• mellombels fråtaking av den rettslegen handleevna
• dom om fråtaking av den rettslege handleevna

Stadfesting av framtidsfullmakt

Ei framtidsfullmakt er ein formell rett du kan gi til éin eller fleire personar om å representere deg den dagen du på grunn av demens eller annan alvorleg sjukdom, ikkje lenger er i stand til å ta stilling til viktige spørsmål på eigne vegner.

Framtidsfullmakta er gyldig frå den dagen du oppretta ho, men den trer ikkje i kraft før den dagen du ikkje lengre kan vareta dine eigne interesser.

Når framtidsfullmakta har tredd i kraft, kan den som representerer deg be Statsforvaltaren om å stadfeste framtidsfullmakta. Statsforvaltaren sender stadfestinga blant anna til registrering i Lausøyreregisteret. Om du har roller eller verv i ei verksemd, blir stadfestinga også registrert i Einings- eller Føretaksregisteret, slik at alle har moglegheit til å sjå kven som representerer deg.

For meir informasjon om kva som er lurt å ha med i ei framtidsfullmakt, kven som kan vere fullmektig og kva krav som gjeld, sjå nettsidene til Statsforvaltaren.

Ved abandonering frigir konkursbuet eigedelar som er utan verdi til skyldnar. Bustyrar sørger for at abandonering blir tinglyst hos oss.

Når det er registrert eit privat beslagsforbod, kan ikkje ein kreditor ta beslag i ein person sine konkrete eigedelar ved utlegg, gjeldsforhandling, konkurs eller offentleg skifte av insolvent dødsbu. Private beslagsforbod kan avtalast i eit testament eller gåvebrev. Givaren kan fastsette at beslagsforbodet også skal sikre mottakaren sine arvingar.

Personleg næringsdrivande kan blant anna pantsette varelager, driftstilbehøyr, landbrukslausøyre.