Om pantobligasjon
Sist oppdatert: 4. desember 2025.
Ein pantobligasjon er eit dokument som i tillegg til å innehalde ein panterett til den som har gitt eit lån, inneheld ei erklæring om skyld frå debitor (pantsettar).
Dokumentet er ofte ein pantobligasjon dersom eitt eller fleire av punktea nedanfor er oppfylt:
- dokumentet er omtalt som ein «pantobligasjon»
- under feltet for pantsettar står det «erkjenner å skylde»
- bak namnet til pantsettar står det «etter ordre»
- dokumentet inneheld opplysningar om forfall/avdrag og renter.
Dette gjer denne dokumenttypen til eit omsetteleg dokument, som betyr at dokumentet kan overdragast (seljast). Det er særlege reglar for handtering av originaldokumentet.
Endringar må skrivast på det originale dokumentet
For å tinglyse endringar (sletting, nedkvittering av pantebeløpet, prioritetsviking eller transport av dokumentet til ny panthavar) i ein pantobligasjon må panthavaren som hovudregel skrive erklæringa på det originale dokumentet. Panthavar kan ikkje skrive endringa på ein stadfesta kopi.
Unntak for kravet om at endringar må skrivast på originaldokumentet, gjeld for enkelte panthavarar:
- Bankar med konsesjon etter finansføretakslova § 2-7 (lovdata.no)
- Bank med filial i Noreg og hovudsete i ein annan EØS-stat som har rett til å drive verksemd som bank i Noreg etter finansføretakslova § 5-2 (lovdata.no)
- Ein institusjon som nemnd i finansføretakslova § 1-6 første ledd (lovdata.no)
Desse panthavarane kan tinglyse endringar på pantobligasjonar ved å skrive eit brev der det aktuelle pantet tydeleg blir identifisert, og kva endring det gjeld. Brevet være underskrevet i original.
Dersom originaldokumentet er borte
Dersom ein pantobligasjon har forsvunne, må dokumentet bli gjort ugyldig (mortifiserast). Mortifikasjonssaker blir førte hos Helgeland tingrett, og du kan lese meir om mortifikasjon på domstol.no. Før du tar kontakt med Helgeland tingrett, bør du bestille ein kopi av dokumentet du ønsker å mortifisere.