Abandonering

Abandonering inneber at eit konkursbu gir tilbake til skyldnar ein eigedel som eigentleg tilhøyrer konkursbuet. Det kan vere eigedelar som er overhefta med pant, eller andre eigedelar som er utan verdi for buet.

Her er ei enkel forklaring:

1. Konkurs er opna
   Ein person eller eit firma er slått konkurs, og ein bustyrar er sett til å handtere eigedelane.
2. Bustyraren vurderer eigedelane
   Bustyraren ser på kva som finst av verdiar, som bilar, utstyr osv.
3. Noko har ingen verdi for buet
   Dersom ein eigedel for eksempel er overhefta (har meir gjeld enn verdi), eller er vanskeleg å selje, kan det vere at buet ikkje tener noko på å behalde han.
4. Bustyraren abandonerer eigedelen
   Da skriv bustyraren ei abandoneringserklæring, som betyr at buet gir slepp på eigedelen.
5. Eigedelen går tilbake til skyldnaren
   Når noko blir abandonert, får den som gjekk konkurs (skyldnaren) eigedelen tilbake og kan bestemme over han igjen.
6. Eller til panthavar
   Dersom det er pant i eigedelen, kan han i staden bli overført direkte til panthavaren (f.eks. banken), som da kan selje han vidare. Denne type abandonering skal ikkje registrerast i Lausøyreregisteret – det er berre abandonering der eigedelen går tilbake til skyldnaren som skal registrerast.

Bustyrar sørger for at følgande opplysningar om abandoneringa blir registrert i Lausøyreregisteret:

• Skyldnaren sitt namn og organisasjonsnummer/fødselsnummer
  Abandoneringa skal registrerast på konkursdebitor, ikkje på konkursbuet sitt organisasjonsnummer
• Tidspunkt for avgjerda
• Oppføring av eigedel(ar) som er abandonert
• Bustyrar si underskrift i original, enten på sjølve avgjerda om abandonering eller på oversendingsbrevet

Melding om abandonering blir automatisk sletta når avslutning av konkursen eller tvangsavviklinga blir notert i Lausøyreregisteret, jf. tinglysingslova § 31.

Bustyrar kan be om sletting av abandoneringa for formuesgode som ikkje lenger skal vere abandonert.

Ved oppslag på motorvogner i oppslagstenesta vår, kan det vere registrert abandonering. Det betyr ikkje at det er eit hefte i motorvogna, men at motorvogna er frigitt frå eit konkursbu.