Kapittel 6: Årsrekneskap

Formål

Brønnøysundregistera blei oppretta i 1988 under Justisdepartementet og er underlagt Nærings- og fiskeridepartementet (NFD). Verksemda er eit ordinært forvaltningsorgan og som frå 2017 fører verksemdsrekneskapen i samsvar med statlege rekneskapsstandardar. Brønnøysundregistera utøver utviklings- og forvaltningsoppgåver for viktige målområde, blant anna Lausøyreregisteret, Føretaksregisteret og Einingsregisteret. Verksemda skal bidra til regjeringa sitt arbeid med å fornye, forbetre og forenkle for næringsliv og innbyggarar.

Årsrekneskapen utgjer del VI i årsrapporten til NFD.

Som det går fram av prinsippnoten er Brønnøysundregistera eit ordinært forvaltningsorgan som fører rekneskap i samsvar med periodiseringsprinsippet. I tillegg rapporterer vi til den sentrale statsrekneskapen etter kontantprinsippet jf. Note A og B.

Stadfesting

Årsrekneskapen er avlagd i samsvar med reglar for økonomistyring, rundskriv R-115 frå Finansdepartementet og krav frå Nærings- og fiskeridepartementet i instruks om økonomistyring. Eg meiner rekneskapen gir eit dekkande bilde av Brønnøysundregistera sine løyvingar, rekneskapsførte utgifter, inntekter, eigedelar og gjeld.

Vesentlege forhold etter kontantprinsippet

Brønnøysundregistera sine utgifter til registerdrifta er på totalt 537,0 MNOK. Samanstilt med løyvingane gir dette ei meirutgift på til saman 1,3 MNOK. Dette inkludert meirinntekt på oppdragsinntekter på 2,9 MNOK, gir eit mogleg overført beløp på 1,6 MNOK til 2025. Resultatet på 1,6 MNOK inkludert den auka løyvinga på 6,8 MNOK som følge av lønnskompensasjonen som kjem til utbetaling i 2025 gir dette eit meirforbruk på 5,2 MNOK for 2024. Dette meirforbruket er relatert til kostnader til auka kjølekapasitet.

Brønnøysundregistera sine gebyrinntekter relatert til registerdrifta blei på 669,6 MNOK for 2024. Det blei innført ny gebyrstruktur for registertenestene frå 1. januar 2024, og det førte til reduserte gebyrsatsar for registrering i Føretaksregisteret og auka gebyrsatsar i Lausøyeregisteret. I tillegg blei det innført gebyr ved førstegangsregistrering i Einingsregisteret, med unntak for ungdoms- og studentbedrifter og frivillige lag og foreiningar.

Brønnøysundregistera sine utgifter til ny registerplattform og prosjekt ”Brukarvennlege registertenester” er på 174,1 MNOK. Samanstilt med løyvinga gir dette ei mindreutgift på 19,4 MNOK som mogleg overførbart beløp.

Det er gjort investeringar i immaterielle eigedelar og varige driftsmidlar etter kontantprinsippet for 139,6 MNOK i 2024. Dei mest vesentlege investeringane er knytte til ny registerplattform, prosjekt Brukarvennlege registertenester og andre utviklingsprosjekt.

Rapportert mellomverande med statskassa er 24 862 895 kroner per 31.12.24. Mellomverande består av skuldig skattetrekk, avsett pensjonspremie til SPK og skuldige offentlege avgifter. Spesifisering av rapportert mellomverande og bokført avrekning med statskassa går fram av Note 7B.

Vesentlege forhold etter periodiseringsprinsippet

Det er i perioden aktivert immaterielle eigedelar for 300,9 MNOK og det er bokført immaterielle eigedelar for 208,6 MNOK under utføring. Dette er i hovudsak relatert til ny registerplattform og andre utviklingsprosjekt. Totalt er det bokført programvare og liknande rettar til ein verdi av 861,4 MNOK.

Totalt er det bokført inntekter frå gebyr på 692,0 MNOK. Det er ein auke på MNOK 141,7 i inntekt frå gebyr samanlikna med 2023. Auken skuldast omlegging til ny gebyrstruktur frå og med 1.1.2024.

Antal utførte årsverk har auka med 36 til 457,5 samanlikna med 2023. Auken skuldast i hovudsak auka oppdragsportefølje og auka behov for drift og forvaltning. Det er balanseført lønn til 74,1 MNOK til eigenutvikling av register. Andre driftskostnader har auka med 66,1 MNOK samanlikna med 2023. Dette skuldast også auka oppdragsportefølje og auka behov for drift, auka lisenskostnader, og auka husleigekostnader som i hovudsak skuldast eingongsutbetaling i forbindelse med utviding av kjølekapasitet.

Tilleggsopplysningar

Riksrevisjonen er ekstern revisor og stadfestar rekneskapen for Brønnøysundregistera. Årsrekneskapen er ikkje ferdig revidert per d.d. Revisjonsmeldinga er venta å vere ferdig innan 1. mai 2025. Årsrekneskapen blir publisert på Brønnøysundregistera sine nettsider 1. mai 2025.

Brønnøysund, 15. mars 2025. Lars Peder Brekk.

Dette er eit samandrag. Les fullstendig årsrapport for 2024 her.