Rettleiing til registrering av tildeling gruppeunntatt stønad

Tildeling av gruppeunntatt stønad skal registrerast innan seks månadar frå datoen stønaden blir tildelt.

Stønad i form av skatte- og avgiftsfordel skal meldast innan eitt år frå fristen til å levere skattemelding.

Stønaden skal registrerast dersom stønaden er på 100 000 euro eller meir i ei tildeling. Dersom stønadsgivar ønsker det, kan også stønader under terskelverdien registrerast.

Dersom fleire føretak i same konsern er tildelt stønad til dei same kostnadene som kan gi rett til stønad frå same stønadsordning eller det same nasjonale rettsgrunnlaget, er terskelverdien nådd når summen av mottatt stønad for alle føretaka tilsvarar 100 000 euro eller meir.

Når du loggar deg inn i skjemaet vil informasjonen vere førehandsutfylt.

Vel stønadsordning frå lista over stønadsordningar som tilhøyrer stønadsgivar. Finn du ikkje ønska stønadsordning må ho opprettast som ny stønadsordning først.

Feltet er førehandsutfylt dersom den valde stønadsordninga berre har ein statsstønadskategori. Dersom det finst fleire statsstønadskategoriar for den valde stønadsordninga, må du velje den statsstønadskategorien som tildelinga gjeld.

Du kan fylle ut skjemaet manuelt eller ved å laste opp ei CSV-fil. Ved manuell registrering kan det leggast inn inntil 50 stønadsmottakarar.

Ved opplasting av CSV-fil må dataa samsvare med innhaldet i skjemaet. Eksempelmal for riktig CSV-format finst i skjemaet.

For gruppeunntatte ordningar skal du velje kva artiklar (område) som ordninga gjeld for. Oversikt over kva artiklar som stønaden gjeld for, finn du i gruppeunntaksmeldinga som dannar grunnlaget for stønadsordninga. Gruppeunntaksmeldinga finst i ESA sin søkbare database General Block Exemption Regulation (GBER) | ESA

Formålet blir automatisk fylt ut, basert på kva artikkel som er vald.

Du skal oppgi organisasjonsnummer eller fødselsnummer til stønadsmottakar.

Du kan finne organisasjonsnummeret til et foretak ved å søke i verksemdsopplysningar.

Du kan oppgi om føretaket er eit lite føretak, mellomstort føretak eller stort føretak. Feltet er berre aktuelt dersom størrelsen på stønadsmottakar er registrert i stønadsordninga.

Du skal oppgi kva næring stønadsmottakar er aktiv i og regionen stønaden skal brukast i.

Du kan berre oppgi ei næring og ein region per stønadstildeling.

Stønadsgivar skal registrere kva stønadsinstrument som blir brukt. Eit stønadsinstrument er den konkrete forma eller mekanismen som blir brukt til å gi offentleg stønad. Eksempek på dette kan vere

• Forskot
• Eigenkapitalinvestering
• Lån
• Rentesubsidiar
• Risikofinansiering
• Tilskot

Ved fleire stønadsinstrument:

Dersom tildelinga inneheld fleire stønadsinstrumenter, skal dei ulike postane i tildelinga registrerast som eigne tildelingar.

Eksempel

Tildelinga til eit føretak utgjer

• tilskot på 450.000, – og eit
• gunstig lån på 800.000,- der stønadselementet utgjer 60.000 (f.eks rimeleg rente)

Registrering i Stønadsregisteret

• ei registrering som oppgir tilskotet på 450.000,-
• ei registrering som oppgir stønadselementet på 60.000,-.