D-nummer
Sist oppdatert: 18. januar 2024.
D-nummer er eit nummer som kan tildelast utanlandske personar som ikkje har norsk fødselsnummer, men har eit behov for identifisering overfor norske myndigheiter.
Vi kan berre rekvirere d-nummer i dei tilfelle det er behov for d-nummer samstundes med registrering av rolleinnehavarar i Einingsregisteret og Føretaksregisteret eller i forbindelse med tinglysing av ektepakt.
På grunn av krav til originalt stadfesta kopi av legitimasjonsdokument ved tildeling av d-nummer, må søknaden sendast inn på papir.
Om du skal bli registrert i ei rolle, som for eksempel styreleiar eller kontaktperson, og ikkje har fødselsnummer eller d-nummer frå før, kan du søke om dette samtidig som du sender inn Samordna registermelding.
Du må sende inn Søknad om d-nummer, BR1015B, per post, saman med originalt stadfesta kopi av legitimasjonsdokument og papirversjonen av Samordna registermelding med vedlegg.
Rettleiing til utfylling finn du i søknadsskjema.
Endring i krav frå 10. juni 2020
Skal du bli registrert som innehavar av enkeltpersonføretak? Personar med d-nummer skal registrerast som innehavar av enkeltpersonføretak må møte på skattekontoret for ID-kontroll før registrering.
Dette gjeld både personar som har d-nummer frå før og personar som skal søke om d-nummer i forbindelse med registreringa.
Meir informasjon om d-nummer og ID-kontroll finn du på Skatteetaten sine nettsider.
Dersom du eller ektefellen din ikkje har fødselsnummer eller d-nummer frå før, kan du søke om dette samtidig som du sender inn ektepakta for tinglysing.
Send inn ektepakta per post saman med søknad om d-nummer, BR1015B, og ein originalt stadfesta kopi av legitimasjonsdokument.
Rettleiing til utfylling finn du i søknadsskjema.
Om du har behov for d-nummer i andre samanhengar enn registrering i eit av våre register, må du ta kontakt med den verksemda som utløyser behovet eller krev d-nummer. Vi kan ikkje bestille d-nummer for andre behov enn ved registrering hos oss.
Les meir om kven som kan bestille d-nummer på Skatteetaten si nettside.
Legitimasjonsdokument skal innehalde
- namn
- fødselsdato
- bilete
- kjønn
- statsborgarskap
- utløpsdato
Normalt vil det vere pass og nasjonalt ID-kort som inneheld dei nødvendige opplysingane nemnd ovanfor. Det er viktig at kontrollinene nedst i passet visast på passkopien. Bakside på ID-kort inneheld som oftast kontrolliner. Derfor må du også legge ved stadfesta kopi av baksida.
Etter hovudregelen skal legitimasjonsdokumentet vere utskrive av offentleg myndigheit.
Kopi kan bli stadfesta av
- norsk offentleg myndigheit
- nordisk politimyndigheit
- norsk advokat
- norsk statsautorisert/registrert revisor
- norsk autorisert rekneskapsførar
- utanlandsk verksemd med notarialkompetanse
Personen som stadfestar kopien må stemple og underskrive på kopien. Vi kan ikkje godta kopi av stempel og underskrift.
Om du har d-nummer frå før, skal du bruke dette ved registrering
Har du ikkje tilgang til eller har spørsmål om d-nummeret ditt, kan du ta kontakt med Folkeregisteret hos Skatteetaten.
Skatteetaten sender ut ei stadfesting på d-nummeret ditt når dei har tildelt nummeret. Stadfestinga sender dei i posten til adressa du er registrert med i Folkeregisteret.