Roller i ein stiftelse

Alle stiftelsar skal ha eit styre, og styret skal alltid ha ein leiar. Styreleiaren blir vald av styret, om ikkje anna er bestemt i vedtektene.

Styret er stiftelsen sitt øvste organ.

I stiftelsar som har ein grunnkapital på tre millionar kroner eller meir, skal styret ha minst tre medlemmer. I slike tilfelle skal heller ikkje dagleg leiar bli vald som styreleiar. Les meir i stiftelseslova § 27.

Styremedlemmene og varamedlemmene må stadfeste at dei tar på seg vervet, ved å signere i Samordna registermelding.

Val av styremedlemmer

Det kan variere kven som har myndigheit til å velje styremedlemmer. Dette går fram av stiftelsen sine vedtekter.

Når du skal registrere styret må du legge ved

• dokumentasjon som viser valet/utnemninga

Kjønnsbalanse

Nokre stiftelsar har krav om kjønnsbalanse i styret. Sjekk om dei nye reglane gjeld dykk. Hvis det gjer det, må desse krava vere oppfylt i styret:

1. Har styret tre eller fire medlemmer, kan maksimalt to styremedlemmer ha same kjønn.
2. Har styret fem eller seks medlemmer, kan maksimalt tre styremedlemmer ha same kjønn.
3. Har styret sju medlemmer, kan maksimalt fire styremedlemmer ha same kjønn.
4. Har styret åtte medlemmer, kan maksimalt fem styremedlemmer ha same kjønn.
5. Har styret ni eller fleire medlemmer, kan maksimalt 60 prosent av styremedlemmene ha same kjønn.

Reglane i nr. 1 til 5 gjeld tilsvarande ved val av varamedlemmer. Styremedlemmer og varamedlemmer må kvar for seg oppfylle desse krava.

Kjønnsbalanse blant dei tilsettvalde

For styremedlemmer som er valde av dei tilsette, medfører reglane om kjønnsbalanse at når det blir vald to eller fleire kan ikkje alle desse ha same kjønn. Det same gjeld for varamedlemmer som er valde av dei tilsette. Har stiftelsen meir enn 200 tilsette er ikkje dette tilstrekkeleg, da gjeld same forholdstal for styremedlemmer og varamedlemmer som er valde av dei tilsette, som for resten av styret (sjå over). Styremedlemmer og varamedlemmer skal vurderast kvar for seg.

Unntak:  Har stiftelsen 200 eller færre tilsette, og eitt av kjønna utgjer meir enn 80 prosent av dei tilsette i stiftelsen på det tidspunktet valet skjer, er det ikkje krav om kjønnsbalanse blant styre- og varamedlemmene som er valde av og blant dei tilsette. Stiftelsen må sjølv dokumentere dette når dei sender inn melding om styreendring.

Styret kan tilsette ein dagleg leiar, om ikkje anna er bestemt i vedtektene.

I næringsdrivande stiftelsar som har ein grunnkapital på tre millionar kroner eller meir, skal styret tilsette ein dagleg leiar. I slike stiftelsar kan ikkje styreleiar vere dagleg leiar.

Dagleg leiar må stadfeste at hen tar på seg rolla, ved å signere i skjemaet.

Du må legge ved protokoll frå styremøtet som viser tilsettinga, dersom ikkje heile styret har signert i skjemaet.

Alle stiftelsar skal ha revisor. Revisor skal i utgangspunktet vere statsautorisert.

Revisor skal veljast av den eller dei personane eller organa som etter vedtektene vel eller peikar ut styret sine medlemmer, om det ikkje er fastsett noko anna i vedtektene.

Unntak 1:

Om ein eller fleire kommunar/fylkeskommunar har rett til å velje eller peike ut eit fleirtal i styret, kan kommune- og fylkesrevisjonen veljast som stiftelsen sin revisor. Det same gjeld der stiftelsen sin aktivitet i vesentleg grad er basert på tilskot eller løyving frå kommune eller fylkeskommune.

Unntak 2:

Om staten eller eit statsorgan har rett til å velje eit fleirtal i styret, eller stiftelsen sin aktivitet i vesentleg grad er basert på statleg tilskot eller løyving, kan Riksrevisjonen veljast til revisor.

Vedleggskrav

Når du skal registrere revisor må du legge ved

• dokumentasjon som viser val av revisor, om stiftelsen er næringsdrivande

Ein stiftelse kan velje om dei skal ha rekneskapsførar.

Dersom føretaket brukar rekneskapsførar, skal dette registrerast.

Det er berre mogleg å registrere autoriserte rekneskapsførarar som er registrerte i Rekneskapsførarregisteret.

Rekneskapsførar må stadfeste i Samordna registermelding at hen tar på seg oppdraget.

Skal du melde rekneskapsførar og stiftelsen er registrert i Føretaksregisteret, må du legge ved dokumentasjon som viser at meld rekneskapsførar er engasjert, dersom ikkje heile styret har signert i skjemaet.

Signatur er ei fullmakt til å opptre og underskrive på vegner av stiftelsen i alle samanhengar.

Det er styret i fellesskap som har signaturrett. Styret kan gi medlemmer eller dagleg leiar rett til å representere stiftelsen ute, aleine eller i fellesskap, om det ikkje er fastsett i vedtektene at styret ikkje skal kunne tildele slik fullmakt.

Når du skal registrere signatur, må du legge ved protokoll frå styremøtet som viser tildeling av signaturrett, dersom ikkje heile styret har signert i skjemaet.

Prokura er ei fullmakt til å opptre og underskrive på vegner av stiftelsen i samband med den daglege drifta.

Du kan ikkje bruke prokura til å hefte eller selje føretaket sin faste eigedom.

Ein person som har prokura kan ikkje overføre han til ein annan person. Ein stiftelse kan gi prokura til ein eller fleire personar. Om det er fleire, kan ein velje om dei skal ha prokura kvar for seg, eller i fellesskap.

Det registrerast berre prokura på næringsdrivande stiftelsar.

Når du skal registrere prokura, må du legge ved protokoll frå styremøtet som viser tildeling av prokura, dersom ikkje heile styret har signert i skjemaet.