Større gåver krev ektepakt
Ektemakar kan sjølvsagt gi kvarandre vanlege gåver
fritt. Men større gåver kan ikkje givast fritt
mellom ektemakane. Grunnen til det er først og fremst
at overføringar av større gåver også
er formuesoverføringar, og dette kan få følgjer
for kreditorane til givaren. Kreditorane må kunne få
opplysningar om slike gåver.
Ekteskapslova krev derfor at det blir oppretta og tinglyst
ektepakt for gåver som blir gitt mellom ektemakar, når
gåvene ikkje kan reknast for å vere vanlege. Kva
som er ei "vanleg" gåve må vurderast
mellom anna i forhold til kva økonomi givaren har.
Det er gjort unntak for gåver som livsforsikring, pensjon
eller liknande. Her gjeld ikkje kravet om å opprette
ektepakt.
Dersom ei ektepakt som inneheld ei gåve skal få rettsvern mot ektefellen sine kreditorar, må den tinglysast i Ektepaktregisteret.
Ektepakta kan endrast
Ei ektepakt som endrar lovføresegnene om formuesforholdet,
kan forandrast eller supplerast dersom begge partar er samde
om det. I praksis skjer det ved at ein oppretter ny ektepakt.
Ektemakane kan óg når som helst kome tilbake
til utgangspunktet for lova, felleseige, ved å opprette
ny ektepakt om det.
|
