|
Arbeidet med samordning av næringslivet si innrapportering
til det offentlege har vore og er ei viktig oppgåve
for Brønnøysundregistra. To av registra i Brønnøysund
har hatt mykje å seie for samordningsarbeidet. Dei to
er Einingsregisteret og Oppgåveregisteret.
Opprettinga av Einingsregisteret i 1995 var ein viktig milestolpe
i arbeidet med samordning. Nyregistreringar, endringar og
slettingar av næringsverksemder blir berre rapporterte
til Einingsregisteret. Dei samarbeidande registra - NAV Aa-registeret,
Meirverdiavgiftsregisteret, Statistisk Sentralbyrå sitt
bedriftsregister, Føretaksregisteret og Fylkesmennene
sitt register over stiftingar - hentar dei opplysningane dei
treng frå Einingsregisteret. Seinare er også Skatteetaten
sitt register for etterskotspliktige kome til som eitt av
dei tilknytte registra. I tillegg er Konkursregisteret eit tilknytt register. Alle konkursbu blir registrerte og får organisasjonsnummer i Einingsregisteret.
Einingsregisteret gir alle nye bedrifter eit ni-sifra organisasjonsnummer,
og nummersystemet er felles for alle dei offentlege næringslivsregistra.
Dermed er det teknisk mogeleg for registra å samarbeide
om informasjon som gjeld same bedrift, i staden for å
spørje kvar sin gong.
Oppgåveregisteret blei oppretta i 1997. Hovudoppgåva
er å halde løpande oversikt over næringslivet
sine oppgåveplikter til det offentlege, og finne vegar
til samordning og forenkling. Oppgåveregisteret sørgjer
for at etatane får kunnskap om kva data som allereie
finst hos andre, og opplysningane kan dermed utvekslast ved
hjelp av organisasjonsnummeret. Oppgåveregisteret har
gjort ein stor jobb for å definere meiningsinnhaldet
i forskjellige spørsmål i statlege spørjeskjema.
Oppgåveregisteret held derfor på å bli ein
nasjonal database for datadefinisjonar. Kvart dataelement
blir kategorisert, definert, gitt eit namn og eit nummer.
Offentlege etatar kan utnytte moglegheitene som ligg i Einingsregisteret
på ein betre måte. Oppgåveregisteret vil
arbeide for at gjenbruken av grunndata frå Einingsregisteret
blir større, slik at samordningseffekten kan betrast.
Brønnøysundregistra
har i tillegg etablert ein elektronisk rekneskapsdatabase. Dei fleste næringsdrivande som har innsendingsplikt til Rekneskapsregisteret, kan no sende inn årsrekneskapane sine elektronisk via Altinn, noko som vil gje ein større samordningseffekt. Politikarane har også
eit ansvar for forenkling og samordning. Nye lover og forskrifter
genererer nye oppgåveplikter, og utan politikarane sin
medverknad er det vanskeleg å oppnå ein reduksjon
i skjema og oppgåveplikter som monnar.
|
