|
ELMER (Enklare og meir effektiv rapportering) er vedteke som retningslinjer for brukargrensesnitt i offentlege skjema på Internett. Retningslinjene er utarbeidde på oppdrag frå Nærings- og handelsdepartementet og skal forvaltast av Brønnøysundregistra.
ELMER konsentrerer seg om å møte dei utfordringane ved utforming og pedagogikk på Internett som er særeigne for skjema. Retningslinjene skal vere med på å sikre at offentleg skjemaproduksjon møter moglegheiter og utfordringar ved elektronisk skjemabasert kommunikasjon på ein einsarta og brukarvennleg måte. Målet er at alle offentlege skjema i løpet av 2008 skal byggje på eit felles brukargrensesnitt.
Forarbeidet til ELMER starta i 2000, og endelege retningslinjer blei utarbeidde i 2006 (ELMER 2). Retningslinjene tek for seg prinsipp og spesifikasjonar for utforming av offentlege skjema på Internett. Retningslinjene er tilgjengelege for nedlasting i PDF-format og som HTML på prosjektet sin nettstad www.elmer.no. Der finst også meir om bakgrunnen for retningslinjene.
|
