Registrering av konsern og føretaksgrupper

Einingsregisteret i Brønnøysund skal innehalde opplysningar om konsern og føretaksgrupper. Alle einingar som inngår i konsern eller føretaksgruppe har plikt til å sende melding til Einingsregisteret. Meldeplikta skal vurderast i samband med fastsetjing av rekneskapen.

Eit konsern er ei gruppe av juridiske personar, eventuelt med forskjellige organisasjonsformer, som har ei slik tilknyting til kvarandre gjennom aksjar, andelar eller stemmer, at ein juridisk person (morselskapet) har bestemmande påverknad på minst ein annan juridisk person (dotterselskapet).

Det følgjer av Einingsregisterlova § 6 første leddbokstav k. at Einingsregisteret skal innehalde opplysningar om einingar som inngår i konsern eller føretaksgrupper. Reglar om registreringsordninga er tekne inn i forskrift av 9 februar 1995 nr. 114 om registrering av juridiske personar m.m. i Einingsregisteret.

Registreringsordninga er i første rekkje underbygt i at grunnlaget for produksjon av offisiell statistikk kan bli forbetra, men skal også hjelpe til å betre det offentlege si kontroll- og tilsynsmyndigheit med denne typen forhold.

Kva forhold skal registrerast?

Einingar som etter lov eller føresegn gitt i medhald av lov, pliktar å la eigen rekneskap eller årsoppgjer inngå i konsernrekneskap eller anna form for fellesrekneskap som gir uttrykk for to eller fleire einingar si samla verksemd, pliktar å sende melding til Einingsregisteret. Dette gjeld ikkje for enkeltpersonføretak.
Meldeplikta omfattar også einingar som på grunnlag av særlege forhold nemnde i lov eller føresegn som er gitt i medhald av lov eller etter søknad til offentleg styresmakt, er unnatekne frå ei elles gjeldande plikt til å setje opp slik rekneskap.
Når eit norsk føretak er ått av eit utanlandsk morføretak eller har eit dotterføretak i utlandet skal ein også gi opplysningar om det utanlandske selskapet, såframt forholdet ville ha blitt omfatta av plikta til å sende inn opplysningar dersom mor- eller dotterføretaket hadde vore heimehørande i Noreg.

Kva for opplysningar skal meldast?

Kvar enkelt eining i eit konsern eller ei føretaksgruppe pliktar å melde opplysningar om:

• namn/føretaksnamn og organisasjonsnummer på mor- og/eller dotterføretak eller andre einingar i føretaksgruppa
• grunnlaget for konsernforholdet/føretaksgruppa (her skal ein gi opp storleiken på eigardelen eller at det er ein avtale som ligg til grunn for skipinga av konsernet/føretaksgruppa)

For einingar som ikkje er registrerte i Einingsregisteret med eigne organisasjonsnummer, f. eks. utanlandske einingar og som inngår i registreringspliktig konsern/føretaksgruppe, skal ein også gi opplysningar etter Einingsregisterlova § 5. Dette er opplysningar som namn, adresse og kontaktperson.
Einingsregisteret vil da gi eininga eit organisasjonsnummer og registrere ho i registeret. Etter § 4 i forskrifta skal det organisasjonsnummeret ein har fått etter denne føresegna berre nyttast i forhold til konsern/føretaksgrupperegistreringa. Det kan såleis ikkje nyttast av eininga i andre samanhengar eller ha verknad som andre organisasjonsnummer.

Når skal opplysningane meldast?

Alle einingar skal vurdere plikta til å gi opplysningar om konsern/føretaksgruppe samtidig som dei fastset eller godkjenner rekneskapen/årsoppgjeret. Konsern- eller føretaksgruppeopplysningane skal meldast til Einingsregisteret seinast ein månad etter fastsetjinga eller godkjenninga av rekneskapen/årsoppgjeret.
Konsern- eller føretaksgruppeopplysningar kan eininga etter behov melde oftare enn dette.

Korleis skal opplysningane meldast?

Opplysningane kan meldast på særskild blankett eller på annan måte, f. eks. ved hjelp av organisasjonskart med nødvendige opplysningar. Plikta til å gi melding til registeret påligg den enkelte eininga i konsernet, men det blir også godteke at det blir sendt inn ei samla melding for heile konsernet. Alle einingane i konsernet vil bli underretta om registreringa.
Blankett kan lastast ned her, eller ein kan kontakte Brønnøysundregistra, 8910 Brønnøysund for å få han tilsendt. Ved nyregistrering av føretaksgrupper skal det sendast inn ei felles melding som viser samansetjinga av heile gruppa. Den enkelte eininga skal stadfeste at opplysningane er rette, slik det er angitt i Einingsregisterlova § 8 og forskrifta sin § 10. Det er ikkje laga noko eigen blankett for registrering av føretaksgrupper.

Kven kan få opplysningar om konsernforhold?

Den som har sendt inn ei melding vil alltid motta ein ordinær endringsrapport og registerutskrift frå Einingsregisteret på eininga som det er meldt opplysningar om.
Alle einingar som er registrerte i konsernet/føretaksgruppa vil både ved registrering første gongen og ved endringar motta konsernrapport og registerutskrift for eininga som viser heile konsernstrukturen.
Opplysningar om registrerte konsern/føretaksgrupper vil ikkje vere tilgjengelege for allmenta. Dei same reglane gjeld for innsyn i desse opplysningane som etter Einingsregisterlova § 22. Det vil seie at opplysningane berre er tilgjengelege for tilknytte register og offentlege styresmakter.