|
Einingsregisteret samordnar opplysningar om næringslivet
og offentlege etatar som finst i ulike offentlege register,
og som er gjengangarar på spørjeskjema. I staden
for at kvar offentleg etat sender ut kvart sitt skjema til
bedriftene, sørgjer Einingsregisteret for at opplysningane
blir samla på ein stad. Da Einingsregisteret vart opna i 1995, vart det karakterisert
som eit av dei viktigaste effektiviseringstiltaka i forvaltninga
dei siste åra.
Einingsregisteret inneheld grunndata
om einingar som har registreringsplikt i NAV Aa-registeret,
Meirverdiavgiftsregisteret, Føretaksregisteret, bedriftsregisteret
i Statistisk sentralbyrå, Skattedirektoratet sitt register over upersonlege skattytarar
eller Stiftingsregisteret. I tillegg er Konkursregisteret eit tilknytt register. Alle konkursbu blir registrerte og får organisasjonsnummer i Einingsregisteret. Andre kan
registrere seg frivillig i Einingsregisteret.
Det ni-sifra organisasjonsnummeret identifiserer einingane
og gjer det lettare for styresmaktene å samarbeide om
utveksling av opplysningar. Andre statlege register pliktar
ut frå einingsregisterloven å samarbeide med Einingsregisteret
og halde opplysningane i registeret oppdaterte. Ei samordna
registermelding erstattar dei tidlegare registreringsskjemaa
frå fleire etatar. Ho sikrar at dei nødvendige
data blir spreidde til etatane som har bruk for registrerings-
og endringsmeldingar.
Ved at alle etatar kan bruke eit felles register til å
utveksle informasjon seg imellom, vil skjemaarbeidet bli enklare
for næringsdrivande og andre som driv økonomisk
verksemd. Mange foreiningar og andre utan registreringsplikt
ser nytten av frivillig å la seg registrere i Einingsregisteret.
Registreringa er gratis.
Alle opplysningane i Einingsregisteret er offentlege, med unnatak av fødselsnummer og D-nummer.
Nøkkelopplysningar kan hentast ut gratis på
Internett og telefon. Mot gebyr kan ein også få
tilsendt utskrifter frå registeret med dei same opplysningane.
|
