Pressemelding 02.01.2012
Innan årsskiftet hadde rundt 48 000 aksjeselskap nytta seg av høvet til å fråvelje revisjon av årsrekneskapen for 2011. Brønnøysundregistra behandla over 30 000 slike saker i løpet av årets to siste månader.
Auken av meldingar til Føretaksregisteret var eksplosjonsarta dei siste vekene av fjoråret. I løpet av november og desember auka delen av aksjeselskap som hadde fått registrert fråval av revisjon med 170 prosent. Normalt tek Føretaksregisteret imot mellom 5 000 og 6 000 meldingar i veka, i denne perioden blei talet på meldingar dobla. Auken gjeld i hovudsak fråval av revisjon for rekneskapsåret 2011. Over 70 prosent av meldingane om fråval av revisjon er sendt elektronisk til Føretaksregisteret.
– Vi har strekt oss langt for å innfri behova til brukarane, og har sett i verk fleire tiltak for å få dette til, som auka overtidsbruk og omdisponering av tilsette i heile organisasjonen ved Brønnøysundregistra, seier underdirektør Øyvind Vågan ved Føretaksregisteret.
Dei aksjeselskapa som ikkje ønska å få revidert årsrekneskapen for 2011 måtte ha vedtaka sine om fråval av revisjon registrerte og godkjende i Føretaksregisteret innan 31. desember 2011. Dersom dette ikkje er tilfelle, må sjølvsagt årsrekneskapen for 2011 vere revidert, og føretaket må vere registrert i Føretaksregisteret med godkjend revisor. For å kunne behandle flest mogeleg av desse meldingane før årsskiftet blei det sett nokre fristar for melding om fråval av revisor: Fristen for å sende inn melding om fråval på papir gjekk ut 30. november, for meldingar innsende elektronisk gjekk fristen ut 10. desember. Føretaksregisteret har rokke å behandle meldingar innkomne til oss langt inn i julehøgtida.
Men det vil alltid vere nokre få som er skikkeleg seint ute, eller at meldinga inneheld slike manglar at ho ikkje blir godkjend. Desse føretaka har derfor ikkje fått registrert fråval av revisjon før 31. desember, og må levere revidert årsrekneskap for 2011.
Les meir om fråval av revisjon
Les meir om framgangsmåten for fråval
|
