14 173 nye føretak registrert fyrste halvår 2011

Pressemelding 07.07.2011

Halvårsstatistikk frå Føretaksregisteret

I løpet av fyrste halvår blei det registrert 14 173 nye føretak og 1 947 aksjeselskap har fråvalt revisjon. No kan enda fleire velje elektronisk innsending til Brønnøysundregistra.

Fyrste halvår 2011 blei det registrert 14 173 nye føretak mot 13 715 nye i same tidsrom i fjor. Dette er drygt 3,3 prosent fleire nyregistreringar enn i same periode i fjor. Dei største tala på nyregistreringar finn vi blant aksjeselskap, enkeltpersonføretak og norskregistrerte utanlandske føretak (NUF).

Oslo på topp
Oslo har flest nyregistrerte med 2 890 nye føretak. Akershus og Hordaland ligg som nummer to og tre.

Flest aksjeselskap
Ved utgangen av juni var det til saman registrert 424 007 føretak i 2011. Aksjeselskap er framleis den vanlegaste organisasjonsforma, med til saman 219 075 registrerte.

Nesten 2 000 aksjeselskap har fråvalt revisjon
Frå 1. mai i år har små aksjeselskap kunna fråvelje revisjon. I løpet av to månader har 1 947 aksjeselskap nytta seg av dette tilgjenget. Nesten kvart tredje selskap som har fråvalt revisjon er nystifta.
- Vi har litt restanse av papirmeldingar om fråval av revisjon. Vi ser ei stigande kurve av slike meldingar no etter at føretaka har sendt inn sjølvmeldinga, seier underdirektør Sverre Hovland ved Brønnøysundregistra.

Fleire kan sende inn elektronisk
Brønnøysundregistra opna i juni for at registrering, endring, oppløysing og sletting av samvirkeføretak kan meldast gjennom Altinn. Det er førebels ikkje mogeleg å nytte det elektroniske skjemaet til å melde omgjering til samvirkeføretak, men dette kjem på plass i løpet av hausten 2011. No kan enda fleire organisasjonsformer sende meldingane sine elektronisk. Det er også blitt mogeleg for alle med roller registrerte i Einingsregisteret og Føretaksregisteret å sende inn meldingar om eigenavgang elektronisk. Tidlegare gjaldt dette berre einskilde organisasjonsformer, men no kan slike opplysningar meldast for alle organisasjonsformene.

Til redaksjonen:
For meir informasjon, ta kontakt med underdirektør Sverre Hovland ved Brønnøysundregistra, telefon 75 00 76 67.

Registreringar og slettingar etter fylke

Registreringar og slettingar i Føretaksregisteret etter organisasjonsform