|
Ny sjef for Altinn ved Brønnøysundregistra blir Kjersti Lauritzen (46) frå Malvik utanfor Trondheim.
Kjersti Lauritzen skal leie e-forvaltningsarbeidet ved Brønnøysundregistra. Ho får ei sentral rolle i vidareutviklinga av Altinn når ho tiltrer stillinga som avdelingsdirektør 15. august. Kjersti Lauritzen kjem frå stillinga som Chief Operation Officer i Star Information System (SIS). SIS er eit konsulent- og programvarehus som leverer programvare og konsulenttenester til rigg- og reiarlagbransjen.
Utfordringane for Altinn har vore store det siste halvåret, men Kjersti Lauritzen gler seg til å leie arbeidet med å forenkle kvardagen for enda fleire i næringslivet. – Altinn er ei sterk drivkraft i fornyinga av offentleg sektor og ein viktig brikke for å nå regjeringa sine mål mot digitalt fyrsteval, seier ho. Lauritzen gler seg til å ta fatt på arbeidet i august.
|
