Merkbar reduksjon i konkurstala i 2010

Pressemelding 03.01.2011

Årsstatistikk for 2010 frå Konkursregisteret

(03.01.2011) Det blei registrert 13,5 prosent færre konkursar og tvangsavviklingar i 2010 enn i 2009. I løpet av året som no er omme blei det registrert 5593 konkursar og tvangsavviklingar her i landet, mens det året før blei registrert 6466.

– Den gledelege tendensen med eit stadig lågare tal konkursar og tvangsavviklingar heldt seg gjennom heile 2010, seier underdirektør Karl Erik Rørmark ved Konkursregisteret.

For eitt år sidan kunne vi melde at konkurstala for 2009 var dei høgaste som nokon gong var registrert. Tendensen for heile 2010 har vore nedgang i konkurstala, og denne utviklinga har halde fram gjennom alle årets 12 månader. Det samla talet for registrerte konkursar og tvangsavviklingar i 2010 ligg likevel merkbart høgare enn 2008, då det var 4 755 registreringar.

Størst reduksjon i 2010 hadde Sør-Trøndelag, med 32.6 prosent færre konkursar og tvangsavviklingar enn i 2009. For Buskerud var nedgangen i konkursar og tvangsavviklingar 26,0 prosent og for Møre og Romsdal 22.1 prosent.

To av fylka opplevde likevel ein auke i konkursar og tvangsavviklingar i 2010. I Troms auka talet med 13,2 prosent, mens Nordland hadde ein auke på 0,7 prosent.

Også i desember månad var det for heile landet reduksjon i konkurstala, samanlikna med året før. Desember 2010 hadde 4,5 prosent færre konkursar og tvangsavviklingar enn den tilsvarande månaden i 2009. Likevel hadde ti av fylka eit høgare tal enn i desember 2009.

Kva er konkurs og tvangsavvikling?

Konkurs blir opna når ein person eller eit selskap ikkje er i stand til å dekkje forpliktingane sine eller når aksjekapitalen for selskapet er oppbrukt.

Tvangsavvikling blir opna når eit selskap har meldt oppløysing, men ikkje har meldt endeleg sletting i Føretaksregisteret – eller når eit selskap etter fleire purringar frå Føretaksregisteret ikkje har meldt inn styremedlemmer, styreleiar, dagleg leiar og revisor. Eit selskap kan og tvangsoppløysast dersom det ikkje sender inn årsrekneskap.

Til redaksjonen:

For meir informasjon til pressemeldinga, ta kontakt med underdirektør ved Konkursregisteret, Karl Erik Rørmark, telefon 75 00 79 89.