Pressemelding 06.07.2010

Halvårsstatistikk frå Føretaksregisteret

Fleire nyregistreringar enn i fjor

Første halvår 2010 registrerte Føretaksregisteret 13 715 nye føretak. Dette er drygt fem prosent fleire nyregistreringar enn i same periode i fjor. Aksjeselskap, enkeltpersonføretak og norskregistrerte utanlandske føretak (NUF) ligg på topp blant nyregistreringane.

Blant dei nye føretaka i år er det flest aksjeselskap, med 6 928 nyregistrerte. 3 167 enkeltpersonføretak blei registrert. Det kom 2 325 nye norskregistrerte utanlandske føretak (NUF) i første halvår, mens 2 364 blei sletta.

NUF på same nivå

– I mars 2010 blei det sletta rundt 1 700 NUF utan hovudføretak i Storbritannia. Dette har nok medverka til at det er registrert 18 prosent fleire NUF første halvår 2010 enn i tilsvarande periode i 2009. Mange av dei som blei sletta og som framleis har verksemd reknar vi med registrerte nytt føretak i Storbritannia og nytt NUF i Noreg, seier underdirektør Sverre Hovland i rådgivarstaben ved Næringsavdelinga.

Oslo framleis på topp med nyregistreringar

Oslo har flest nyregistrerte, med 2 798 nye føretak, mens Akershus og Hordaland ligg som nummer to og tre.

Flest aksjeselskap

Ved utgangen av juni var det til saman registrert 418 206 føretak. Aksjeselskap er framleis den vanlegaste organisasjonsforma, med til saman 215 894 registrerte.

Elektronisk registrering meir vanleg

Auken i elektronisk registrering gjennom Altinn.no held fram. Ved hjelp av denne tenesta kan du melde endring og sletting og registrere nye einingar i Einingsregisteret, Føretaksregisteret, Meirverdiavgiftsregisteret og NAV Aa-registeret.

Til redaksjonen:

For meir informasjon, ta kontakt med underdirektør Sverre Hovland ved Næringsavdelinga, telefon 75 00 76 67.

Registreringar og slettingar fordelte på fylke

Registreringar og slettingar i Føretaksregisteret fordelte på organisasjonsform