2006-tal frå Føretaksregisteret

70 prosent auke i nyregistrerte aksjeselskap

Det blei registrert 70 prosent fleire aksjeselskap i Føretaksregisteret i 2006 enn året før. Ei av årsakene er eit etterslep på rundt 14 000 nye AS i samband med dei endra skattereglane i 2005. Ser vi bort frå dette er det likevel ei rekordhøg mengd nyregistrerte aksjeselskap.

- Auken har vore på 45 prosent når vi ser alle organisasjonsformane under eitt. Ved førre årsskiftet sat vi igjen med 14 000 ubehandla meldingar om nye aksjeselskap som kom inn i desember i samband med endra skattereglar. Desse hadde vi ikkje moglegheit til å behandle før på nyåret i fjor, og dei utgjer ein stor del av voksteren. Samanlikna med tidlegare "normalår" reprtesenterer talet pånyregistrerte aksjeselskap i 2006 ein auke på rundt 60 prosent dersom nyregistreringar grunna endra skatteraglar blir haldne utanfor, seier underdirektør Øyvind Vågan.

49 000 nye selskap

Totalt var det ved årsskiftet registrert 382 760 føretak i Føretaksregisteret. Det blei registrert heile 49 163 nye selskap fordelt på alle organisasjonsformene. Det er ein auke på 45 prosent frå året før. Av desse er det 34 813 nyregistrerte aksjeselskap, ein auke på 70 prosent. Det er no registrert totalt 192 168 aksjeselskap i Føretaksregisteret. Det utgjer vel 50 prosent av den totale bestanden i Føretaksregisteret.

Enkeltpersonføretak aukar igjen

Mengda avnye enkeltpersonføretak som er registrerte i Føretaksregisteret, stig igjen etter ein nedgang på 12 prosent i 2005. Det blei i fjor registrert 7 232 nye enkeltpersonføretak i Føretaksregisteret, ein auke på 8,3 prosent. 127 033 enkeltpersonføretak står no registrert i Føretaksregisteret. I tillegg er 191 638 enkeltpersonføretak kun registrert i Einingsregisteret. Enkeltpersonføretak som driv handel med innkjøpte varer eller har meir enn fem tilsette i hovudstilling, pliktar å registrere seg i Føretaksregisteret. Andre enkeltpersonføretak kan registrere seg på frivillig basis.

Fleire NUFar

Ei veksande organisasjonsform i Føretaksregisteret er norske avdelingar av utanlandske føretak, såkalla NUF. Samanlikna med 2005 har talet på nyregistrerte NUF flata ut i 2006. Det blei i fjor registrert 2 618 nye NUF i Føretaksregisteret, og bestanden var ved årsskiftet på 7 742.

Flest i Oslo

Det har vore auke i mengda nyregistreringar i alle fylka i Noreg. Det er som tidlegare år områda rundt dei store byane som toppar statistikken over nyregistreringar. Flest nyregistrerte var det i fylka Oslo (9 535, pluss 38 prosent), Akershus (5297, pluss 48 prosent) og Hordaland (5050, pluss 63 prosent). Det er også Hordaland som har den største prosentvise auken i talet på nyregistreringar.

Færre slettingar

Nedgangen i talet slettingar i Føretaksregisteret fortset også i 2006. 15 011 selskap blei sletta mot 15 265 i 2005, ein nedgang på 1,7 prosent. Nedgangen i 2005 var på 9,3 prosent. Netto tilvekst i Føretaksregisteret i 2006 var 34 152 føretak. Totalt er det no registrert 382 760 føretak i Føretaksregisteret.

Registreringar og slettingar i Føretaksregisteret fordelte på fylke

Registreringar og slettingar i Føretaksregisteret fordelte på organisasjonsformar