Forlenga frist for årsrekneskapen
(20.06.2005) Det blir forlenga frist til 1. september for selskap som sender inn årsrekneskapen til Brønnøysundregistra elektronisk via Altinn. Fredag 17. juni passerte lovendringa statsråd. I prinsippet er innsendingsfristen 1. august som før, men blir årsrekneskapen send inn via Altinn før 1. september, slepp selskapet å betale forseinkingsgebyr.
I følgje lovendringa er det Finansdepartementet som har fått fullmakt til å utsetje fristen for selskap som sender inn elektroniske årsrekneskap via Altinn. Departementet legg opp til at innsendingsfristen blir utsett til 1. september for rekneskap avslutta pr.31.12. og til 1. mars for rekneskap avslutta i perioden frå 1. januar til 30. juni. Effekten av tiltaket skal evaluerast seinast etter ein treårsperiode.
Stimulere til auka bruk
- Årsaka til ønsket om ein månad utsett frist for selskap som sender inn elektroniske årsrekneskap, er å stimulere til auka bruk av Altinn, og ønske om at fleire skal gå over frå papir til elektronisk innsending. Papirbaserte rekneskapar inneber ei ressurskrevjande oppfølging i form av manuell registrering i rekneskapsdatabasen, mens elektronisk innsende årsrekneskap gjennom Altinn vil gi ei vesentleg meir effektiv registrering og enklare saksbehandling i Rekneskapsregisteret. I tillegg vil dei som sender inn via Altinn spare tid, spesielt dei som er tilknytte fagsystem, seier underdirektør Gisle Tøgersen i Rekneskapsregisteret.
Få elektroniske årsrekneskapar
I fjor var det berre 9 000 som sende inn elektroniske årsrekneskap av 155 000 innsendingspliktige selskap. Det utgjer knapt 6 prosent. Ved å utsetje fristen håper Rekneskapsregisteret at ein mykje større del av årsrekneskapane skal kome inn elektronisk.
Blir støtta av rekneskapsførarane
Forslaget om utsett frist blir støtta av Norges Autoriserte Regnskapsføreres Forening. I ei spørjeundersøking blant medlemer svarte 57 % av dei som hadde teke stilling til innleveringsmåte at årsrekneskap blir planlagd levert via Altinn. Blant dei resterande 43 % svarer så mange som 68 % at levering via Altinn likevel blir, eller kan bli, aktuelt dersom fristen blir utsett.
|
