Pressemelding 18.09.2003

Fleire tusen aksjeselskap risikerer tvangsoppløysing

Nærmare 30 000 aksjeselskap risikerer tvangsoppløysing dersom dei ikkje aukar aksjekapitalen til det lovbestemte minstekravet på 100 000 kroner innan årsskiftet.

Pr. 15. september var det framleis 28 472 selskap som ikkje oppfylte kravet til aksjekapital. Føretaksregisteret fryktar at ein stor del av desse selskapa går mot tvangsavvikling.

Går tregt

I den nye aksjelova, som tok til å gjelde 1. januar 1999, blei kravet til aksjekapital oppjustert frå 50 000 kroner til 100 000 kroner. Den gongen var det i overkant av 85 000 aksjeselskap som hadde mindre aksjekapital enn 100 000 kroner. Desse selskapa hadde fem år på seg til å auke kapitalen. Ved årsskiftet 2002/2003 var det i underkant av 40 000 selskap som enno ikkje hadde auka kapitalen. Sidan årsskiftet har det gått tregt, berre 11 000 selskap har til no i år fått aksjekapitalauken på plass.

Prosessen tek tid

Underdirektør Jostein Dyrkorn ved Føretaksregisteret understrekar at det tek til å haste for selskapa som enno ikkje har innfridd kapitalkravet.
- Dersom desse selskapa framleis skal vere med og unngå tvangsoppløysing, må arbeidet med kapitalauken kome i gang så snart som mogeleg. Hausten går fort og prosessen tek tid. Dei selskapa som ikkje fekk vedteke kapitalauken på den ordinære generalforsamlinga, må halde ny generalforsamling, og for etternølarane tek tida til å renne ut, seier Jostein Dyrkorn.

Viktig for å bli teke seriøst

- Eg oppmodar alle etternølarane til å ordne opp, ikkje minst for å unngå vanskar for dei sjølve, og unngå at ein tidkrevjande prosess med tvangsoppløysing blir sett i gang. Dessutan er det viktig å tenkje på at skal ein bli teken seriøst av bankar og samarbeidspartnerar, er det viktig å ha dei formelle sidene ved selskapet i orden.
For Føretaksregisteret sin del er det også viktig at vi får inn meldingane om kapitalauke til behandling så raskt som mogeleg slik at meldingane ikkje hopar seg opp mot slutten av året, seier underdirektør Jostein Dyrkorn.

Aksjeselskap som pr. 15. september ikkje har oppfylt kravet i aksjelova krav om å auke aksjekapitalen til 100 000 kroner.

.