Ny teneste frå Brønnøysundregistra:
1,3 millionar årsrekneskap på Internett
Om lag 1,3 millionar årsrekneskap frå dei
ti siste rekneskapsåra er nå tilgjengelege for
nedlasting frå Brønnøysundregistra sine
Internettsider.
- Internett er for lengst blitt den største kanalen
for å gi publikum tilgang til informasjonen frå
registra våre. Mange tenester har vore tilgjengelege
lenge, men å gjere årsrekneskap tilgjengelege
for nedlasting frå internettsidene våre er ein
milestolpe i denne utviklinga, seier avdelingsdirektør
Geir Ebbesen ved Brønnøysundregistra.
Nye og gamle rekneskap
Frå byrjinga av juli har det vore mogeleg å søkje
i elektronisk innleverte årsrekneskap. For rekneskapsåra
2001 gjeld det berre vel 1 600 av om lag 155 000 innsende
årsrekneskap. Dei rundt 1,3 millionar rekneskapane som
er sende inn på papir dei siste ti åra har ikkje
vore tilgjengelege på Internett før nå.
Rekneskapsregisteret i Brønnøysund mottek kvart
år årsrekneskap frå norske føretak
og gjer dei tilgjengelege for ålmenta. Årsrekneskapane
inneheld viktig informasjon som skal vere tilgjengeleg, og
selskap som ikkje overheld plikta til å sende inn rekneskapen,
risikerer forseinkingsgebyr og tvangsoppløysing.
Biletfiler
I meir enn ti år har Rekneskapsregisteret skanna inn
kvar einaste side i årsrekneskap, notar og meldingar
som er sende inn til Brønnøysundregistra. Årsrekneskapane
er lagra som komprimerte biletfiler på store harddiskar.
Det er denne lagringsmetoden som gjer det mogeleg å
tilby nedlasting av årsrekneskapane over Internett.
Årsrekneskapane blir gjorde tilgjengelege for nedlasting
i Portable Document Format (PDF), eit utbreidd format for
utveksling av dokument på Internett. I tillegg til at
det er eit format dei fleste kan bruke, gjer PDF-formatet
også at filene som blir overførde blir små.
For årsrekneskap med mange sider er det likevel snakk
om forholdsvis store datamengder.
Elektroniske fordelar
Mange har blitt vane med å bruke den automatiske Brønnøysundfaksen
til å hente ut rekneskap frå Brønnøysundregistra.
Håpet er at tilbodet om å laste ned årsrekneskap
på Internett etter kvart vil overta for både faks
og vanleg postsending.
- Blant fordelane ved å laste årsrekneskapane
ned frå Internett er at ein får rask tilgang til
informasjonen og at rekneskapane kan lagrast elektronisk i
staden for på papir. I tillegg er ikkje tenesta avhengig
av opningstider - årsrekneskapane kan lastast ned 24
timar i døgnet sju dagar i veka, seier Geir Ebbesen.
Til redaksjonen:
For ytterlegare informasjon, ta kontakt med avdelingsdirektør
for Opplysningsavdelinga, Geir Ebbesen på telefon 75
00 76 13 eller informasjonssjef Dagfinn Torgersen på
telefon 75 00 78 03.
|
