Pressemelding 20.03.2002

1060 selskap i fare for tvangsoppløysing

Pr. 1. mars 2002 hadde 1 060 innsendingspliktige selskap enno ikkje sendt inn årsrekneskapen for rekneskapsåret 2000. Rekneskapsregisteret i Brønnøysund har gitt selskapa ein siste frist til 10. april til å sende inn ein komplett rekneskap. Dersom fristen ikkje blir overheldt, vil skifteretten bli varsla og selskapa kan bli tvangsoppløyste. Oversikt over kva aksjeselskap som ikkje har sendt inn årsrekneskapen, vil bli offentleggjord på http://www.brreg.no/oppslag/kunngjoring.html, i Norsk lysingsblad og i aktuelle lokalaviser den 20. mars.

– Fristen for å sende inn årsrekneskap, årsmelding og revisjonsmelding for rekneskapsåra 2000 gjekk ut 1. august 2001. Etter fleire purringar er det framleis 1 060 selskap av 137 700 innsendingspliktige som ikkje har sendt inn årsrekneskapen innan 1. mars. Desse selskapa vil no få ein absolutt siste frist, 10. april, for å ordne opp slik at ein unngår ei eventuell tvangsoppløysing av selskapa, seier kontorsjef Hilde Majala i Rekneskapsregisteret.

Auke frå i fjor

Talet på selskap som ikkje overheld innsendingsfristen har auka i forhold til i fjor. Da mangla 972 årsrekneskapar mot 1 060 i år, ein auke frå 0,72 prosent til 0,77 prosent av alle innsendingspliktige.
– Dette tyder at over 99 prosent av alle årsrekneskapane for 2000 er tilgjengelege i Rekneskapsregisteret. Grunnen til at det blir brukt så mykje ressursar på å få inn årsrekneskapane, er at dei inneheld viktig informasjon som er av offentleg interesse. Derfor har styresmaktene bestemt at årsrekneskapane skal vere tilgjengelege frå Regnskapsregisteret slik at alle interesserte kan få innsyn, seier Hilde Majala.

Forseinkingsgebyret aukar

Etter lova er eit aksjeselskap pålagt å sende inn ein komplett årsrekneskap til Rekneskapsregisteret i Brønnøysund innan ein månad etter at han er vedteken av generalforsamlinga til selskapet, og seinast innan 1. august. Er ikkje årsrekneskapen sendt inn og godkjend innan denne fristen, må selskapet betale eit forseinkingsgebyr.
Pr. 20. mars er forseinkingsgebyret kome opp i 50 275 kroner, og vil auke med 2 010 kroner pr. veke. Forseinkingsgebyret løper inntil selskapet har sendt inn og fått godkjend årsrekneskapen, har fått godkjend melding om sletting i Føretaksregisteret eller skifteretten har treft rettsavgjerd om tvangsoppløysing.

Til redaksjonen:

Nedanfor finn de fylkesvis oversikt over dei selskapa som vil få kunngjort varsel om tvangsavvikling for rekneskapsåret 2000 i Norsk lysingsblad og lokalaviser den 20.03.2002. Kunngjeringane finn du også på Brønnøysundveven.
Dersom det er behov for fordeling på kommunar, må de ta kontakt med Rekneskapsregisteret.

Talet på innsendingspliktige selskap som ikkje har sendt inn årsrekneskapen for rekneskapsåret 2000 innan 1. mars fordelt på fylke: