(18.04.2008) Dei aller fleste leverer årsrekneskapane sine punktleg. Dei 854 einingane som enno ikkje har levert 2006-rekneskapane sine utgjer berre fem promille av totalt 181 763 innsendingspliktige. Desse får no fire veker til å ordne opp før dei blir sende til tingretten.
– Komplette dokument må vere innsende før 16. mai 2008. Dersom så ikkje skjer, vil Rekneskapsregisteret varsle tingretten om at vilkåra for tvangsavvikling er til stades, seier underdirektør Harald Alstad ved Rekneskapsregisteret. Aksjelova, allmennaksjelova og bustadbyggjelagslova fastset prosedyrane rundt oppløysing av einingar som ikkje overheld innsendingsfristane.
Auke
I år er det nokre fleire einingar enn i fjor som ikkje har levert 2006-årsrekneskapane innan tidsfristen. Då fristen gjekk ut 1. april 2008, var det i alt 854 aksjeselskap, allmennaksjeselskap og bustadbyggjelag som enno ikkje hadde sendt inn årsrekneskapen for rekneskapsåra 2006 til Rekneskapsregisteret. Det er ein svak auke sidan i fjor, då 586 einingar av totalt 150 040 innsendingspliktige var for seint ute med innsendingane. – Frå 2005 til 2006 auka talet på innsendingspliktige med om lag 30 000 nye einingar. Dette kan vere noko av årsaka til auken, seier Alstad. På tross av at det er auke i forhold til førre år, er det berre fem promillar av totalt 181 763 innsendingspliktige aksjeselskap, allmennaksjeselskap og bustadbyggjelag som ikkje har levert rekneskapane sine for 2006.
Oslo auka mest
Oslo hadde den størst auken i talet på årsrekneskap som ikkje er innsende, frå 148 til 282. Aust-Agder er framleis det fylket kor færrast einingar lèt vera å overhalde innsendingsfristen: Her var det fire som ikkje leverte rekneskapane tidsnok, mens det året før ikkje var etternølarar i Aust-Agder. Det einaste fylket kor færre enn før er seinka med årsrekneskapen, er Finnmark, med 12 etternølarar mot 30 året før.
Kommune- og fylkesoversyn
Oversikta over einingane er kunngjort i lokalaviser og på nettsidene våre, kor du finn informasjon om kva einingar kunngjeringane gjeld.
|
