(29.10.2007) Alle verksemder i privat og offentleg sektor i Noreg skal få tildelt nye næringskodar baserte på ny standard for næringsgruppering.
Den nye standarden gir ei meir føremålstenleg og oppdatert framstilling av aktivitetane i næringslivet og offentleg sektor, med meir vekt på tenesteytande næringar.
Standarden samsvarer med den nye standarden til EU, NACE Rev. 2. Dette sikrar at det blir mogleg å samanlikne på tvers av landegrensene.
Den norske standarden SN2007 er tilpassa tilhøva i Noreg på det mest detaljerte nivået (femte siffer). NACE Rev.2 blei vedteken av Parlamentet og Rådet 20. desember 2006 som ny rådsforordning (EF) 1893/2006. Det nasjonale nivået blei vedteke av SSB 6. desember 2006, etter ei brei høyring.
Alle verksemder i Einingsregisteret i Brønnøysundregistra er registrerte med ein næringskode etter gammal standard (SN 2002), og skal derfor omkodast til den nye standarden (SN 2007). Det er Statistisk sentralbyrå (SSB) som står for sjølve omkodinga og kodane vil bli tilførde Einingsregisteret.
Ein stor del av omkodingsarbeidet skjer gjennom ei maskinell omkoding, ettersom det er 1:1-relasjonar for vel 50 prosent av einingane. Om lag 25 prosent av dei resterande einingane blir omkoda ved hjelp av tilgjengeleg informasjon i ulike administrative register, kjedeinformasjon, rekneskap og liknande. For den resterande delen må SSB innhente tilleggsinformasjon for å fastsetje korrekt næringskode. Dette blir gjort i løpet av 2. halvår 2007.
Brønnøysundregistra og SSB byrjer med å dobbeltkode etter ny og gammal standard frå 1. november i år, og dobbeltkodinga varer i heile 2008. Dette er fyrst og fremst ut frå SSB sine behov knytte til overgangen mellom ny og gammal standard i statistikkane.
Overgangen i statistikkane er samordna av Eurostat som er EU sitt statistiske kontor, der dei første statistikkane etter ny standard kjem i 2009. Det er og ønskjeleg med ein rimeleg grad av samordna overgang til ny standard elles i samfunnet.
Vidare er det slik at denne overgangen bør vere eit reint kutt, slik at gammal kode ikkje lenger skal brukast og ny kode blir teken i bruk. SSB meiner det vil vere uheldig og uhøveleg å operere med to kodesett overfor omverda. Overgang til ny standard med grunnlag i Einingsregisteret kjem mot slutten av 2008.
Desse dokumenta er no tilgjengelege:
|
