 |
Underdirektør Gisle Tøgersen ved Rekneskapsregisteret tilrår elektronisk innsending av årsrekneskap gjennom Altinn. |
(23.03.2006) Rekneskapsregisteret har i år lagt til rette for elektronisk innsending av årsrekneskap. Frå no av vil ikkje følgjeskrivet «Vedlegg til årsrekneskap» kome i posten til alle innsendingspliktige. Denne endringa blir i år varsla i brev. Fordelane med å sende inn elektronisk er mange. Ein av dei er ein månad lengre frist.
– I år ventar vi at 50 prosent av årsrekneskapane blir sende inn elektronisk gjennom Altinn. Det seier underdirektør ved Rekneskapsregisteret, Gisle Tøgersen. Han gir fleire grunnar for forventningane sine. Ein av dei er at innsendinga går føre seg enkelt og sikkert. Altinn har dessutan eit arkiv som gir alle med sentrale rollar full oversikt over eininga sine eigne skjema. I arkivet blir også status vist for Rekneskapsregisteret si behandling av innsende årsrekneskap.
Sender du inn årsrekneskapen elektronisk, har du også ein månads utsett frist. Elektronisk innsende årsrekneskap for rekneskapsåret 2005 skal vere sende inn før 1. september 2006.
Ved å gi opp e-postadressa i skjemaa våre, vil du få tilbakemelding som fortel om årsrekneskapen blei godkjend eller nekta allereie dagen etter saksbehandlinga.
Skulle du framleis ønskje å sende inn årsrekneskapen i posten, kan du laste ned følgjeskrivet frå Brønnøysundregistra sine nettsider. Ved å skrive inn organisasjonsnummer og rekneskapsår, får du eit førehandsutfylt følgjeskriv som du skriv ut på kvitt papir og legg ved innsendinga slik som tidlegare. For årsrekneskap som blir sende i posten gjeld den vanlege innsendingsfristen – altså før 1. august 2006.
– Men vi håper sjølvsagt at så mange som mogeleg ser fordelane med å sende inn årsrekneskapen elektronisk gjennom Altinn og nyttar seg av det, avsluttar Tøgersen.
|
