(03.12.2003) - Altinn gir Brønnøysundregistra
ei kjempeutfordring og eit godt høve til framleis positiv
utvikling. Det seier direktør Erik Fossum i ein kommentar
til at Regjeringa har lagt forvaltninga av den statlege skjemaportalen
til Brønnøysundregistra.
Regjeringa har bestemt at Brønnøysundregistra
skal overta forvaltninga og leie vidareutviklinga av Altinn
frå mai neste år. Altinn er regjeringa si store
satsing for å få ein felles kanal for elektronisk
innrapportering til det offentlege. I forslaget til statsbudsjett
foreslår regjeringa at Brønnøysundregistra
får vel 23 millionar kroner til forvaltninga av Altinn.
 |
|
Altinn blir ei eiga avdeling med lokale sentralt
i Storgata i Brønnøysund, nokre hundre
meter frå resten av Brønnøysundregistra.
|
- Gjennom Altinn får vi ein sentral posisjon ved gjennomføringa
av elektronisk forvaltning i Noreg. Det er det viktigaste
tiltaket i samband med målsetjinga til regjeringa om
at alle offentlege etatar innan utgangen av 2004 skal kunne
motta elektroniske innrapporteringar frå næringslivet.
Målet er at det skal bli enklare og billigare å
rapportere, samtidig som styresmaktene skal få data
av høg kvalitet, fortset Fossum.
Trur på suksess
Altinn starta som eit samarbeidsprosjekt mellom Skattedirektoratet,
Statistisk Sentralbyrå og Brønnøysundregistra.
Etter kvart har også Statens lånekasse valt å
satse på Altinn, mens fleire andre etatar er i ferd
med å knyte seg til den digitale innrapporteringskanalen.
Direktøren for Brønnøysundregistra har
stor tru på at Altinn blir ein suksess.
- Allereie i utgangspunktet vil dei om lag 80 skjema som
er med i Altinn representere rundt 60 prosent av rapporteringsbyrden
frå næringslivet. Det betyr at eit viktig suksesskriterium
langt på veg er oppfylt allereie frå starten av,
nemleg at Altinn skal bli den føretrekte rapporteringskanalen
til det offentlege. Men skal vi nå målet med å
få med dei resterande 40 prosentane, og i tillegg tilby
andre tenester som for eksempel personleg sjølvmelding,
har Brønnøysundregistra ein stor jobb å
gjere.
Gode føresetnader
Altinn vil bli organisert som ei eiga avdeling i Brønnøysundregistra.
I første omgang er det kunngjort 8 stillingar, med
høve for å utvide staben etter kvart. Erik Fossum
meiner regjeringa hadde fleire gode grunnar for å leggje
Altinn-administrasjonen til Brønnøysund.
- Eit av hovudmåla våre er samordning og forenkling
for næringslivet. Vi sit allereie på dei viktigaste
verktya for dette gjennom Einingsregisteret og Oppgåveregisteret.
Også Altinn handlar om samordning, forenkling og effektivisering.
Altinn passar derfor svært godt inn i profilen til Brønnøysundregistra.
Dessutan har vi allereie god kontakt med dei fleste aktuelle
etatane. Med andre ord har vi alle føresetnader for
å lukkast - men det krev mykje hardt arbeid framover,
understrekar Fossum.
|
