 |
|
No kan du laste ned 1,3 millioner årsrekneskap
for dei ti siste rekneskapsåra på Internett.
|
(14.11.2002) Om lag 1,3 millionar årsrekneskap frå
dei ti siste rekneskapsåra er nå tilgjengelege
for nedlasting frå Brønnøysundregistra
sine Internettsider.
- Å gjere årsrekneskap tilgjengelege for nedlasting
frå internettsidene våre er ein milestolpe i arbeidet
med å tilrettelegge for uthenting av opplysningar på
Internett, seier avdelingsdirektør Geir Ebbesen ved
Brønnøysundregistra.
Gamle og nye rekneskap
Frå byrjinga av juli har det vore mogeleg å søkje
i elektronisk innleverte årsrekneskap. For rekneskapsåra
2001 gjeld det berre vel 1 600 av om lag 155 000 innsende
årsrekneskap. Dei rundt 1,3 millionar rekneskapane som
er sende inn på papir dei siste ti åra har ikkje
vore tilgjengelege på Internett før no.
Biletfiler
I meir enn ti år har Rekneskapsregisteret skanna inn
kvar einaste side i årsrekneskap, notar og meldingar
som er sende inn til Brønnøysundregistra. Årsrekneskapane
er lagra som komprimerte biletfiler på store harddiskar.
Det har mellom anna gjort det mogeleg å tilby kopi av
årsrekneskapane på Brønnøysundfaksen.
Det er denne lagringsmetoden som no óg gjer det mogeleg
å tilby nedlasting av årsrekneskapane over Internett.
Internett har for lengst blitt den største kanalen
for uthenting av opplysningar frå registra i Brønnøysund,
og tilbodet om å laste ned årsrekneskap på
Internett vil truleg etter kvart overta for både faks
og vanleg postsending.
Tenesta
Årsrekneskapane blir gjorde tilgjengelege for nedlasting
i Portable Document Format (PDF), eit utbreidd format for
utveksling av dokument på Internett. I tillegg til at
det er eit format dei fleste kan bruke, gjer PDF-formatet
også at filene som blir overførde blir små.
For årsrekneskap med mange sider er det likevel snakk
om forholdsvis store datamengder.
Uthenting av årsrekneskap er ei gebyrbelagt teneste.
Før du kan laste ned årsrekneskapane på
Internett, må du vere registrert
som brukar. Det inneber mellom anna at du må leggje
inn opplysningar om adresse for fakturering. Det kostar ingen
ting å få tildelt brukarnummer og passord.
Fram til nyttår vil det vere mogeleg å hente
ut rekneskapstal frå
elektronisk innleverte årsrekneskap gebyrfritt. For
rekneskapsåret 2001 gjeld det vel 1 600 rekneskap.
|
