 |
|
Kravet om stadfesting av underskrift har falle bort,
og snart vil feltet bli fjerna frå registreringsblankettane.
|
(18.02.2002) Frå 1. januar i år er det ikkje
lenger nødvendig å få underskrifta di stadfesta
når du skal melde registrering eller endring til Føretaksregisteret.
Dette er ei lita forenkling ved utfyllinga av blanketten,
som likevel kan føre til at langt færre meldingar
blir sende tilbake til dei næringsdrivande og på
den måten seinkar registreringsprosessen.
– Det var ei lovendring av 21. desember 2001 som slo
fast at kravet i Føretaksregisterlova om stadfesting
av underskrifter skulle opphevast frå og med 1. januar
2002. Dermed slepp du å skaffe ein advokat, advokatfullmektig
eller to myndige personar til å stadfeste at det er
nett du som har signert blanketten. Det fortel underdirektør
Jostein Dyrkorn ved Føretaksregisteret.
Blir teke ut av blanketten
Forenklinga gjeld både «Samordna registermelding»
(Hovudblanketten) og «Forenkla registermelding»
(Blankett for enkeltmannsføretak). Utfyllingsfeltet
med krav om stadfesting av underskrifta vil etter kvart bli
fjerna frå både papirblankettane og Internettversjonane.
I mellomtida kan vi berre gle oss over å sleppe å
fylle det ut.
Fort gjort å gløyme
– Ved utfylling av registermeldingar er det ofte så
enkle ting som underskrifter folk gløymer å få
med. Derfor kan denne vesle forenklinga faktisk vere med på
å redusere talet på meldingar som blir sende attende
til brukarane med krav om fleire opplysningar. No kan altså
både den næringsdrivande og saksbehandlarane ved
Brønnøysundregistra gle seg over eit lite grep
som kan gjere skjemajobben enklare for alle partar, avsluttar
Dyrkorn.
|
