Rettleiing til fellesblankett for registrering i
- Einingsregisteret
- Føretaksregisteret
- Meirverdiavgiftsregisteret
- Arbeidsgivardelen av Arbeidsgivar-/arbeidstakarregisteret
- Statistisk sentralbyrå sitt bedrifts- og føretaksregister
- Fylkesmennene sitt register over stiftingar
- Skattemanntalet for etterskotspliktige
Innhald
Samordna registermelding
Slik fyller du ut blanketten
Krav til vedlegg
Samordna registermelding
Blanketten "Samordna registermelding" er ein fellesblankett
for registrering i Einingsregisteret, Føretaksregisteret,
Meirverdiavgiftsregisteret og fylkesmennene sitt register over
stiftingar. Med denne blanketten samlar eit også inn
grunndata til arbeidsgivardelen av Arbeidsgivar- og arbeidstakarregisteret,
Statistisk sentralbyrå sitt bedrifts- og føretaksregister
og Skattemanntallet for etterskotspliktige. Blanketten kan
sendast til Einingsregisteret eller eitt av dei nemnde tilknytte
registra. Mottakaren formidlar dei innsende opplysningane
vidare. Det er derfor ikkje nødvendig å sende
inn opplysningane direkte til det tilknytte registeret der
dei skal registrerast.
Blanketten består av følgjande delar:
Del 1 - Hovudblankett
Del 2 - Tillegg for Meirverdiavgiftsmanntalet
Blanketten skal brukast både når ei eining
skal registrerast første gongen, når registrerte
opplysningar om ei eining skal endrast, blant anna opplysningar
om kjøp, sal eller nedlegging av verksemd, og når
ein skal melde frå om at ei eining skal oppløysast
eller slettast.
Når du ønskjer å slette ei eining og samtidig
registrere ei ny, skal det fyllast ut to blankettar. Når
det gjeld endringar, skal du fylle ut berre dei felta som
skal endrast (unnateke felt 1.1.). Dersom endringa inneber
at opplysninga skal slettast utan at ho blir erstatta med
nye opplysningar, skriv du "går ut" i feltet.
Tilleggsblankett
Driv eininga verksemd på fleire stader, skal du også
fylle ut særskild blankett (del 1 B). Den får
du tilsend frå Brønnøysundregistra når
du har kryssa av i blanketten for at du driv verksemd på
fleire stader.
Kva delar av blanketten som skal fyllast ut, avheng av
kvar eininga skal registrerast eller er registrert:
Registrering/endring/sletting i Føretaksregisteret
og Einingsregisteret:
Det er nok å sende inn del 1 dersom eininga berre søkjer
registrering i Einingsregisteret og Føretaksregisteret.
Det same gjeld ved endring og sletting i desse registra. Eininga
kan også søkje registrering i Føretaksregisteret
etter at ho alt er registrert i Einingsregisteret.
Registrering/endring/sletting i Meirverdiavgiftsregisteret:
Einingar som driv meirverdiavgiftspliktig verksemd, skal
vere registrerte i Meirverdiavgiftsregisteret. Dei må
fylle ut både del 1 og del 2. Desse blankettane skal
sendast samla til Einingsregisteret eller fylkesskattekontoret
dersom eininga ikkje er registrert i Einingsregisteret frå
før. (Sjå rettleiing til felt 2.1 i blanketten.)
Dersom eininga tidlegare har meldt inn dei nødvendige
opplysningane og er registrert i Einingsregisteret, kan del
2 sendast inn for seg.
Underskrifter
Både del 1 og del 2 skal underskrivast. Dersom du
ikkje følgjer underskriftskrava, blir meldinga ikkje
registrert.
Kva er Einingsregisteret?
Einingsregisteret er eit samordningsregister for seks tilknytte
register. Desse registra er:
- Føretaksregisteret
- Meirverdiavgiftsregisteret
- Arbeidsgivardelen av Arbeidsgivar- og arbeidstakarregisteret
- Statistisk sentralbyrå sitt bedrifts- og føretaksregister
- Fylkesmennene sitt register over stiftingar
- Skattemanntalet for etterskotspliktige
Einingsregisteret skal forenkle registrering og bruk av registreringspliktige
data både for dei einingane som skal gi opplysningane,
og for dei offentlege etatane som skal bruke dei. Når
du melder ei registreringspliktig opplysning til Einingsregisteret,
sender Einingsregisteret dei melde opplysningane vidare til
dei registra der eininga er registrert eller skal registrerast.
Kva skal registrerast i Einingsregisteret?
Opplysningar om einingar og den verksemda som einingane driv,
blir registrerte og sende vidare av Einingsregisteret. Det
er derfor svært viktig at du skil mellom omgrepa eining
og verksemd når du fyller ut blanketten.
Eining: Samleomgrep for personar, selskap, foreiningar,
sameige o.a. som har plikt eller rett til å registrere
seg i Einingsregisteret etter § 4 i einingsregisterlova.
Verksemd: Den aktiviteten som eininga driv. Verksemd
på forskjellige geografiske stader og/eller i ulike
bransjar blir rekna som ulike verksemder. Ei eining kan eige
ei eller fleire verksemder. Eit aksjeselskap eig f.eks. ein
bokhandel og eit trykkjeri. I dette dømet eig eininga
(aksjeselskapet) to verksemder.
Innhenting av opplysningar frå
andre register
Ei viktig oppgåve for Einingsregisteret er å
oppdatere grunndata i andre register. På same måten
vil Einingsregisteret bli oppdatert med opplysningar frå
andre register. Einingsregisteret er direkte tilkopla Sentralkontoret
for folkeregistrering. For at Einingsregisteret skal vere
oppdatert når det gjeld endringar i namn og adresser
til rolleinnehavarar (kontaktperson, styre, deltakarar osv.),
må slike endringar meldast snarast råd til folkeregisteret.
Offentligheit for registrerte
opplysningar
Opplysningar om eininga sitt firma eller namn, eininga si
adresse, organisasjonsform, formål (art, bransje), stiftelsestidspunkt
og kven som er dagleg leiar for eininga, er offentleg tilgjengelege
frå Einingsregisteret. Det same gjeld opplysningar om
eininga sin status, næringskode og institusjonell sektorkode,
telefonnummer, telefaksnummer og andre elektroniske adresser.
Andre opplysningar er ikkje offentleg tilgjengelege frå
Einingsregisteret.
Når det gjeld Føretaksregisteret, har alle rett
til å gjere seg kjende med opplysningane som er registrerte
der, og få utskrift av det. Dette gjeld likevel ikkje
fødselsnummer.
For dei andre registra som er knytte til Einingsregisteret,
gjeld andre reglar om offentlegheit. Opplysningar om dei reglane
som gjeld, kan du få ved å kontakte det aktuelle
registeret.
|
